زیاتر لە هەفتەیەک لەمەوبەر هێزەکانی ڕووسیا لە هەندێک لە ناوچەکانی ئۆکرانیا کشانەوە، بەڵام هێزە بەرگرییەکانی هەرێمی سومی باکووری ئۆکرانیا بەردەوامن لە مەشقەکانیان و ئامادەکاری دەکەن بۆ ڕووبەڕووبوونەوەی هێرشی زیاتری ڕووسیا.
ماوەیەکی کەم دوای دەستپێکردنی داگیرکارییەکەی ڕووسیا لە ئۆکرانیا کە سەرۆکی ڕووسیا ڤلادیمیر پوتن بە " ئۆپەراسیۆنێکی سەربازیی تایبەت " ناوی دەبات، هێزەکانی ڕووسیا چوونە سنووری سومییەوە و شەڕی کۆڵان بە کۆڵانییان کرد و بەرەو کیێڤی پایتەخت پێشڕەوییان کرد.
سەرۆکی بەڕێوبەرایەتی هەرێمی و سەربازیی سومی دمیترۆ ژیڤیتسکی لەو کاتەدا وتی هیچ هێزێکی سەربازیی لە هەرێمەکەدا نەبوون، ئەوەی هەبووە تەنها هاوڵاتیانی ناوچەکە بوون هەرچی چەکێک لەبەردەستیاندا بووبێت هەڵیانگرتووە و دژی هێزەکانی ڕووسیا بەکارییان هێناون، لەو چەکانەش مۆلۆتۆڤ کۆکتەیڵس.
ڕۆژی پێنجشەممە ژیڤیتسکی لە سومی بە ڕۆیتەرزی وت " بەپێی ڕووسییەکان بێت، پلانییان هەیە لە سێ بۆ پێنج ڕۆژدا سومی بگرن."
وتی " وادیارە زانیویانە کە لەو کاتەدا لە سومی هیچ هێزێکی سەربازیی بوونی نەبووە و تەنها هاوڵاتیان بەرگرییان کردووە."
وتیشی لە 8 ی مانگی چواردا هێزەکانی ئۆکرانیا هەرێمەکەیان دووبارە کۆنتڕۆڵ کردەوە.
ئاماژەی بەوەشدا " پێم وایە ئەگەری ڕوودانی هێرشێکی نوێ زۆر زۆرە. ئەوان سوورن لەسەر ئەوە و ئێمەش لەوە تێدەگەین کە ژمارەی هاوڵاتیان لە ڕووسیا نزیکەی 150 ملیۆنن. هەتاوەکو تانک و خەڵکیان هەبێت بەردەوام دەبن لە ناردنییان."
سەرچاوە/ ڕۆیتەرز
هەرێمی سومی باکووری ئۆکرانیا ئامادەکاری دەکات بۆ هێرشێکی نوێی ڕووسیا
