وتەبێژی باڵیۆزخانەی چین لە لەندەن وتی سەردانەکەی سەرۆک وەزیری پێشووی بەڕیتانیا لیز تڕەس بۆ تایوان " نمایشێکی مەترسیداری سیاسیی بووە و هیچ سوودێکی نییە جگە لە زیان گەیاندن بە بەڕیتانیا."
وتەبێژی باڵیۆزخانەکە لە بەیاننامەیەکدا کە لە ماڵپەڕی باڵیۆزخانەکە بڵاوکراوەتەوە دەڵێت " داوا لە سیاسییە پەیوەندیدارەکانی بەڕیتانیا دەکەین هەڵەکانی ' تڕەس ' ڕاست بکەنەوە، چیتر نمایشی سیاسیی لەگەڵ پرسی تایواندا مەکەن. هەروەها دەست لە پشتیوانیکردنتان هەڵبگرن لە هێزە جیاخوازەکانی سەربەخۆیی تایوان."
لە دوای سەردانەکەی سەرۆک وەزیری پێشووی بەڕیتانیا مارگرێت تاچەر لە ساڵەکانی نەودەکاندا بۆ تایوان، تڕەس دیارترین سیاسەتمەداری بەڕیتانیایە سەردانی تایوان بکات، گەشتەکەشی لە کاتێکدایە کە پەیوەندییەکانی نێوان بەڕیتانیا و چین لە خراپترین دۆخدان.
تڕەس نوێنەرایەتی بەشێکی پارتی پارێزگارانی فەرمانڕەوای بەڕیتانیا دەکات کە دژی سیاسەتی بەڕیتانیان بەرامبەر چین، سیاسەتەکە بریتییە لە هەوڵدان بۆ پەیوەندیکردن لەگەڵ چین لە بوارەکانی وەکو بازرگانی و گۆڕانی کەش و هەوا و لە هەمان کاتیشدا سنووردانان بۆ مەترسییەکانی سەر ئاسایشی نیشتیمانی وڵاتەکە.
سەرچاوە/ ڕۆیتەرز
باڵیۆزخانەی چین ڕەخنە لە سەردانەکەی سەرۆک وەزیری پێشووی بەڕیتانیا بۆ تایوان دەگرێت
