Accessibility links

شاندێکی پارتی کرێکارانی بەریتانیا سەردانی قامیشلو دەکات


شاندێکی بەریتانی کە لە ئەندامانی پارتی کرێکارانی ئۆپـۆزسیۆن پـێکهاتووە، سەردانی قامیشلویان کردووە و لەوێ لەگەڵ کاربەدەستانی ناوچەکە کۆبوونەتەوە.

شاندەکە دوێنێ سێشەممە لە ڕێگەی دەروازەی سێمێلکاوە گەیشتنە قامیشلو و پـێکهاتووە لە مۆریس گلاسمان ئەندامی ئەنجومەنی لۆردان و پەرلەمانتار لوید ڕەسڵ مویڵ و سیمۆن دبینگ بەڕێوەبەری ئۆفیسی نێودەوڵەتی سەندیکاکان و یان فلیچەر بەرپـرسی سەندیکاکانی بەریتانیا.

مۆریس گلاسمان لە کۆنگرەیەکی ڕۆژنامەوانی لە قامیشلو گوتی " ئێمە لێرەین بۆ پەیوەندیـیەکی درێژدەم لەگەڵتاندا، تاوەکو پشتیوانیتان بکەین لە دژی هەر کەسێک بیەوێت ئازادی و دیموکراسیەکەتان لەناوببات."

پاشان گوتی سەردانی ناوچە جیاجیاکانی باکوری سوریا دەکەن و چاویان بە شەڕڤانانی یەپەگە و یەپەژە دەکەوێت لەگەڵ ئەنجومەنی سیڤیلی شار و شارۆچکەکان.

لوید ڕەسڵ مویڵ ئەویش گوتی لە گەڕانەوەیان بۆ بەریتانیا ئەنجامی سەردانەکەیان بە پەرلەمان و خەڵکی وڵاتەکەیان دەگەیەنن. هیواشی خواست حکومەتی وڵاتەکەی وردەکاری باشتر بکات لە فرۆشتنی چەک بە تورکیا.

بڕیارە شاندەکە ئەمڕۆ چوارشەممە سەردانی شاری کۆبانی بکات.

XS
SM
MD
LG