دەزگای بەرگری ئەلیکترۆنی حکومەتی بەڕیتانیا هۆشداری دەدات لەسەر زیادبوونی هەڕەشەکانی سەر ژێرخانە هەستیارەکانی ڕۆژئاواوە لەلایەن ئەو هاککەرانەوە کە پشتیوانی لە ڕووسیا و جەنگەکەی دەکەن لە ئۆکرانیادا.
ناوەندی ئاسایشی نیشتیمانی ئەلیکترۆنی بەڕیتانیا وتی " چالاکەوانە هاککەرەکانی " سەر بە ڕووسیا هەڵمەتی بێ زیانییان لە ڕێی ئۆنلاینەوە ئەنجام داوە کە ماڵپەڕە گشتییە دیارەکانی تێکداوە و لە کاری خستوون. بەڵام هەندێک لەو گروپانە چالاکانە پلانییان داناوە زیانێکی ڕاستەقینە بگەیەنن.
وتیشی " هەندێکیان ئاماژەیان بە ئارەزووی خۆیان داوە بۆ کاریگەرییەکی وێرانکەرتر و تێکدەرتر لەسەر ژێرخانی هەستیاری نیشتیمانی ڕۆژئاوا، بە بەڕیتانیاشەوە."
وتیشی " پێشبینی دەکەین ئەو گروپانە بە دوای دەرفەتێکدا بگەڕێن تاوەکو ئەو جۆرە کاریگەرییەیان هەبێت، بە تایبەتی ئەگەر پاراستنی سیستمەکان لاواز بێت."
وتیشی سەرەڕای ئەوەی ئەو گروپانە پاڵنەری ئایدۆلۆژییان هەیە و خۆیان لەگەڵ بەرژەوەندییەکانی ڕووسیادا دەگونجێنن، بەڵام " ناچنە ژێر دەسەڵاتی فەڕمی دەوڵەتەوە."
وتی " ئەمە وایان لێدەکات کەمتر پێشبینیکراو بن."
هێرشێکی ئەلیکترۆنی سەرکەوتوو بۆ سەر ژێرخانێکی هەستیاری نیشتیمانی وەکو ژێرخانی وزە یاخود ژێرخانی دابینکردنی ئاو دەکرێت زۆر وێرانکەر بێت و زیانێکی گەورەی ڕاستەقینەی هەبێت.
وتیشی ئەو جۆرە هێرشانە کە توانایەکی تەکنیکی زۆر بەرز و سەرچاوەی زۆری دەوێت تاوەکو جێبەجێ بکرێن، " بەبێ یارمەتییەکی دەرەکی " قورس دەبێت بۆ گروپەکانی چالاکەوانە هاککەرەکان سەرکەوتووانە ئەنجامی بدەن، بەڵام هۆشداریدا لەوەی " ڕەنگە بە تێپەڕبوونی کات کاریگەرتر بن."
سەرچاوە/ ڕۆیتەرز