بەرپرسی هەماهەنگی ئامادەکارییەکان بۆ جیابوونەوەی بەڕیتانیا لە یەکێتی ئەوروپا مایکڵ گۆف وتی سەرۆک وەزیری وڵاتەکە بۆریس جۆنسن هەتاوەکو 31 ی مانگی یەک جیابوونەوەکە جێبەجێ دەکات و دواتر تاوەکو کۆتایی ساڵی 2020 ڕێکەوتنێکی بازرگانی نوێ لەگەڵ یەکێتی ئەوروپادا واژۆ دەکات.
جۆنسن و حیزبی پارێزگارانی بەڕیتانیا سەرکەوتنێکی گەورەیان لە هەڵبژاردنەکانی هەفتەی ڕابردووی بەڕیتانیادا بەدەست هێنا و زۆرینەی کورسییەکانی پەرلەمانیان بەدەستهێنایەوە.
سەرۆک وەزیری بەڕیتانیا بۆریس جۆنسن چەند جارێک بەڵێنی جێبەجێکردنی جیابوونەوەی بەڕیتانیایداوە لە یەکێتی ئەوروپا، بۆیە دەبێت سەرەتا ئەو بەڵێنە جێبەجێ بکات و دواتر کاربکات لەسەر بەڵێنەکانی دیکەی، لەوانەش زیادکردنی بودجەی خزمەتگوزاری تەندروستی گشتی.
گۆف بە کەناڵی سکای نیوزی وت " دەتوانم دڵنیاتان بکەمەوە هەلێکمان لەبەردەستدا دەبێت بۆ دەنگدان لەسەر پڕۆژە یاسای جیابوونەوە لە یەکێتی ئەوروپا، لە ماوەیەکی کەمیشدا. دواتر سەنگ دەخەینە سەر ئەوەی پێش 31 ی مانگی یەک جێبەجێ بکرێت."
هەروەها سەبارەت بە ڕێکەوتنی بازرگانی لەگەڵ یەکێتی ئەوروپادا گۆف وتی " ساڵی داهاتوو ئەو ڕێکەوتنەش واژۆ دەکرێت. لە بارودۆخێکدا دەبین کە تیایدا ڕێگەمان دەدات پێش 31 ی مانگی یەک لە یەکێتیەکە جیاببینەوە و دانوستانەکانمان لەگەڵ یەکێتی ئەوروپا بە گفتوگۆکردن سەبارەت بە چوارچێوەیەکی نوێ بۆ بازرگانی سەربەخۆ و هاریکاری لە نێوانماندا کۆتای پێدەهێنین. ئەمەش تاوەکو کۆتای ساڵی داهاتوو جێبەجێ دەکرێت."
سەرچاوە/ ڕۆیتەرز