حکومەتی ئیماڕات ڕێکەوتنی ئاسایکردنەوەی پەیوەندییەکانی لەگەڵ ئیسڕائیل پەسەند کرد، ئەمەش دوای ئەوەی مانگی ڕابردوو بە سەرپەرشتی ئەمەریکا ڕێکەوتنەکە لە واشنتن واژۆ کرا.
هەریەک لە ئیماڕات و بەحرەین لە مانگی نۆدا ڕێکەوتنی ئاسایکردنەوەی پەیوەندییەکانیان لەگەڵ ئیسڕائیلدا واژۆ کرد کە ماوەی 25 ساڵە لەو جۆرە ڕێکەوتنانە لەنێوان وڵاتانی عەرەبی و ئیسڕائیلدا واژۆ نەکراوە.
حکومەتی ئیماڕات لە تویتەر نوسیویەتی " ئەنجومەنی وەزیران بە سەرۆکایەتی محەمەد بن ڕاشد ڕێکەوتنی ئیبراهیمی بۆ ئاشتی پەسەند کرد، هەروەها پەیماننامەی ئاشتی و پەیوەندییە دیبلۆماسیەکانی نێوان دەوڵەتی ئیماڕاتی عەرەبی و ئیسڕائیلی پەسەند کرد."
ئەوەشی خستەڕوو " ئەنجومەنی وەزیران متمانەی بە ڕێکەوتنی ئیبراهیم بۆ ئاشتی هەیە و بنچینەیەک دەبێت لە بنچینەکانی ئاشتی و سەقامگیری لەپێناو پشتیوانیکردن لە خواستی گەلانی ناوچەکە، هەروەها پشتیوانیەکە لە هەوڵەکانیان بۆ بەدیهێنانی خۆشگوزەرانی و پێشکەوتن، بەتایبەتیش ڕێگەخۆشکەر دەبێت بۆ پتەوکردنی پەیوەندییە ئابووری و ڕۆشنبیری و زانستیەکان."
لەلای خۆیەوە هەفتەی ڕابردوو پەرلەمانی ئیسڕائیل بە زۆرینەی دەنگ ڕێکەوتنەکەیان پەسەند کرد.
واپێشبینی دەکرێت ڕۆژی سێشەممە شاندێکی ئیماڕات بە هاوەڵی بەرپرسانی ئەمەریکا سەردانی ئیسڕائیل بکەن.
سەرچاوە/ ڕۆیتەرز