جێگری سەرۆک وەزیری تورکیا دەڵێت حکومەتەکەی پاش ئەوەی باری نائاسایی ڕاگەیاند، بە شێویەکی کاتیش کارکردن بە پەیمانـنامەی ئەوروپایی بۆ مافەکانی مرۆڤ ڕادەگرێت، ئەوەی ئامانج لێی پاراستنی مافەکانی مرۆڤ و ئازادیـیەکانە.
کەناڵی تەلەفیزیۆنی NTV ی تورکی ئەمڕۆ پـێنجشەممە لە زاری نوعمان کورتوڵموش بڵاویکردەوە کە گوتویەتی بە هاوشێوەی حکومەتی فەڕەنسا دەکەن و کارکردن بەو پەیمانـنامەیە ڕادەگرن.
گوتیشی ئەو باری نائاسایـیەی حکومەتەکەی ڕایگەیاندووە ڕەنگە مانگێـکی دیکە یان مانگ و نیوێـکی دیکە کۆتاییپـێبهێنرێت. باسی لەوەش کرد لە کاتی هەوڵی کودەتاکە کەموکوڕی لە دەزگای زانیاری وڵاتەکەدا هەبووە لەسەر ئاستی چوارچێوەی کارکردن و هەروەها تاکە کەسیش. باسی لەوەش کرد کە لە ئێسـتادا کاردەکرێت بۆ سەرلەنوێ ڕێـکخستنەوەی لەشکری وڵاتەکە.