Accessibility links

تورکیا دەڵێت لەگەڵ ڕووسیا ڕێکەوتوون سەبارەت بە ئاگربەستێـکی گشتی لە سوریا

  • VOA News

وەزیری دەرەوەی تورکیا دەڵێت بەرنووسی دوو ڕێکەوتن سەبارەت بە قەیرانی سوریا کاری لەسەر دەکرێت، یەکێـکیان بۆ ئاگربەستە لەو وڵاتە و ئەوی دیکەیان بۆ دەسـتپـێـکردنی پـرۆسەی چارەسەری سیاسیـیە.

مەولود چاوش ئۆغڵو ئەمڕۆ چوارشەممە ئەمەی بۆ ڕۆژنامەوانان ڕاگەیاند، پاش چەند کاژمێرێـک لەوەی ئاژانسی ئانادۆڵوی دەوڵەتی تورکیا بڵاویکردەوە کە بەپـێی سەرچاوەی بڕواپـێکراو تورکیا و ڕووسیا ڕێکەوتوون لەسەر بەرنووسێـک بۆ ئاگربەستێـکی گشتی لە سوریا و بڕیارە ڕەوانەی بەردەم لایەنەکانی قەیرانی سوریا بکەن، بەڵام ڕێکخراوە تێرۆرستیـیەکانی ناگرێتەوە.

ئاژانسەکە دەشڵێت سەرچاوەکان گوتوشیانە ئەنکەرە و مۆسکۆ هەوڵێـکی زۆر دەدەن تاوەکو ئاگربەستەکە لە شەوی پـێنجشەممەوە بچێتە قۆناغی جێبەجێکردنەوە، وە ئەگەربێت ئاگربەستەکە سەری‌گرت، ئەوا دانوستاندن لە نێوان ڕژێمی سوریا و ئۆپـۆزسیۆن لە ئەستانەی پایتەختی کازاخستان بە سەرپەرشتی ڕووسیا و تورکیا دەسـتپـێدەکات.

لە مۆسکۆ، دیمتری پـێسکۆڤ گوتەبێژی کرملێن ئامادە نەبوو هیچ لێدوانێـک لە بارەی ئەم هەواڵەوە بدات و گوتی هیچ زانیاری تەواوی لەم بارەیەوە لەلادا نیـیە. بەڵام گوتی کاربەدەسـتانی ڕووسیا و تورکیا لە پەیوەندیدان بۆ تاووتوێکردنی وردەکاری چۆنیەتی ئەنجامدانی وتووێژەکان لە ئەستانە.

XS
SM
MD
LG