Accessibility links

سەرۆکی تورکیا لە وڵاتی کوەیتەوە گەیشتە دۆحەی پایتەختی قەتەر و لەوێ لەگەڵ میری قەتەر کۆبوویەوە و سەرپەرشتی واژوکردنی ژمارەیەک گرێبەستی نێوان هەردوو وڵاتیان کرد.

ڕەجەب تەیب ئەردۆغان و شاندی یاوەری شەوی سێشەممە گەیشتنە دۆحە و لە فڕۆکەخانەی حەمەدی نێودەوڵەتی لایەن خالید عەتیە وەزیر بەرگری پـێشوازیان لێکرا.

هەریەک لە جەنەڕاڵ خڵوسی ئەکار سەرۆکی ئەرکانی لەشکری تورکیا و مەولود چاوش‌ئۆغڵو وەزیری دەرەوە و نیهاد زیبکچی وەزیری ئابوری و برائەت بەیرەق وەزیری وزە و سەرچاوە سروشتیـیەکان و ئەحمەد ئەشرەف وەزیری کشتوکاڵ لە نێو شاندەکەی ئەردۆغاندان.

ئەمڕۆ چوارشەممە لە لایەن تەمیم بن حەمەد ئال ثانی میری قەتەر لە دیوانی میرنشین بە فەرمی پـێشوازی لێکرا و پاشان هەردوو ڕێبەر کۆبوونەوە و بە سەرپەرشتی هەردووکیان وەزیر و کاربەدەستانی هەردوو وڵات ژمارەیەک گرێبەستیان واژوکرد.

هەروەها سەرۆکی تورکیا سەردانی بنکەی سەربازی وڵاتەکەی لە دۆحە کرد و لەوێ چاوی بە سەربازانی تورک کەوت.

ئەم سەردانەی ئەردۆغان بۆ قەتەر لە کاتێکدایە کە پەیوەندیـیەکی نێوان قەتەر و ژمارەیەک لە وڵاتانی عەرەبی کەنداو لە دۆخێکی خراپدایە. هێشتا ڕوون نیـیە ئایا سەرۆکی تورکیا سەردانی ئەو وڵاتانەی دیکەی کەنداو دەکات یان نا، لەوانە عەرەبستانی سعودیـیە.

XS
SM
MD
LG