هێزه‌کانی پـۆلیسی تورکیا به لایه‌نی که‌م 35 کوردیان ده‌سـتگیرکردووه به تاوانی په‌یوه‌ندیـیان به کۆما جڤاکا کوردسـتانێ (که‌جه‌که)، له نێویاندا ژماره‌یه‌ک ڕۆژنامه‌وان هه‌ن.
کاربه‌ده‌سـتانی پـۆلیس گوتیان ئه‌مڕۆ سێشه‌ممه ئه‌م هه‌ڵمه‌تی ده‌سـتگیرکردنانه له ئسته‌نبوڵ و شه‌ش شـاری دیکه‌ی سه‌رانسه‌ری وڵاته‌که له یه‌ک کاتدا ئه‌نجامدراون.
ده‌زگاکانی ڕاگه‌یاندنی ده‌وڵه‌تی تورکیا ده‌ڵێن ئه‌وانه‌ی ده‌سـتگیرکراون له ئه‌نجامی لێـکۆڵینه‌وه له‌گه‌ڵ ئه‌و سه‌دان که‌سه بووه که گومان ده‌کرێت ئه‌ندامی که‌جه‌که بن. به‌ڵام ئه‌م ده‌سـتگیرکردنانه مه‌ترسیـیه‌کان له‌سه‌ر ئاستی ئازادی ڕۆژنامه‌گه‌ری له تورکیا زیادده‌کات.
وڵاته یه‌کگرتووه‌کانی ئه‌مه‌ریکا و یه‌کێتی ئه‌وروپا ڕه‌خنه‌یان له‌م کاره گرت و داوایان له تورکیا کرد به یاساکانی دژه تێرۆری وڵاته‌که‌یدا بچێته‌وه.