Accessibility links

داواکاری گشتی تورکیا داوادەکات سەڵاحەدین دەمیرتاش 142 ساڵ حوکمی زیندانی بدرێت

  • VOA News

داواکاری گشتی تورکیا داوایکردووە هەردوو هاوسەرۆکی پارتی دیموکراتی گەلان (هەدەپە) بۆ دەیان ساڵ زیندانی بکرێن، بە تاوانی پەیوەندی بە پارتی کرێکارانی کوردسـتانەوە (پەکەکە).

داواکاری گشتی ئەمڕۆ سێشەممە سکاڵای خۆی تۆمارکردووە و تیایدا داوایکردووە سەڵاحەدین دەمیرتاش هەتا 142 ساڵ و فیگەن یوکسەکداغ هەتا 83 ساڵ حوکمی زیندانی بدرێن.

سەرەتای مانگی یازدەی ساڵی ڕابردوو هەردوو هاوسەرۆکی هەدەپە لەگەڵ 9 پەرلەمانتاری دیکەی سەر بە پارتەکەیان دەسـتگیرکران بە تاوانی وەکو وەزارەتی ناوخۆی تورکیا دەڵێت، پـڕۆپاگەندە بۆ پەکەکە و هاندانی خەڵکی بۆ ڕق و کینە و پەیوەندیکردن بە پەکەکەوە و هەوڵی تێـکدانی یەکپارچەیی خاکی تورکیا، بۆیە داواکارانی گشتی لە دیاربەکر و هەکاری و وان و شەرناخ و بینگۆل داوای دەسـتگیرکردنیان کردوون.

جێی ئاماژەیە هەدەپە لە هەڵبژاردنە پەرلەمانیـیەکەی 7 ی مانگی شەشی ساڵی 2015 ، لە کۆی 550 کورسیـیەکەی پەرلەمانی تورکیا 80 کورسی بردەوە، بەڵام ئاکەپە لەگەڵ پارتەکانەدا ڕێکنەکەوت بۆ پـێکهێنانی حکومەت، بۆیە لە 1 ی مانگی یازدەی 2015 هەڵبژاردنەکان دووبارەکرانەوە و ژمارەی کورسیـیەکانی هەدەپە بۆ 59 دابەزین.

هەروەها لە هەڵبژاردنەکانی سەرۆکایەتی ساڵی 2014 ، سەڵاحەدین دەمیرتاش نزیکەی 4 ملیۆن دەنگی بەدەسـتهێنا کە دەکاتە 9.76% لە کۆی دەنگدەران. ڕەجەب تەیب ئەردۆغان بە دەنگی 21 ملیۆن کەس کە 51.79% ی دەنگدەرانی دەکرد پـۆستی سەرۆکایەتی بردەوە.

XS
SM
MD
LG