Accessibility links

رۆشنبیرانى کەرکوک: باڵیۆزى تورکیا هەوڵ بۆ تێکدانى ئاشتى کۆمەڵایەتى له ‌کەرکوک دەدات


لێدوانێکى باڵیۆزى تورکیا لە عێراق کە شارى کەرکوکى بە خاکى باوباپیرانى ناوبرد، کاردانەوەى کوردەکانى کەرکوکى لێکەوتۆتەوە و پێیانوایە تورکیا تۆوى دووبەرەکى لەو شارە دەچێنێت.

رۆژى سێشەمە، فاتیح یەڵدزى باڵیۆزى تورکیا لە عێراق دواى ئەنجامدانى نوێژى جەژن لەکەرکوک، رایگەیاند"کەرکوک بۆ ئەوان خاکى باوباپیرانە و بۆ دانیشتوانى شارەکەش، تورکیا خاکى باوباپیرانە."

رێبوار تەها پەرلەمانتارى هەڵبژێردراوى یەکێتى لەکەرکوک، بەدەنگى ئەمەریکاى راگەیاند"کەرکوک هى هەموو کەرکوکیەکان و دانیشتوانى کەرکوکە."

ئەمرۆ چوارشەمە، گروپێک لە رۆشنبیرانى کوردى کەرکوک، بانگەوازێکیان ئاراستەى "رۆشنبیران و خەمخۆرانى کەرکوک" کردووە، لێدوانەکەى باڵیۆزى تورکیایان بە زیادەرۆیى و نایاسایى وەسفکردووە.

لە بانگەوازەکەدا، هۆشدارى دراوە لەوەى کە لێدوانەکەى باڵیۆزى تورکیا رێگەخۆشکەرە بۆ هەڵایسانى شەر ى نێوان پێکهاتەکان، جەخت لەسەر ئەوەشکراوەتەوە ئەمرۆ گرد بوونەوە دژى ئەو لێدوانە ئەنجام دەدەن ، داوا لەبەغدا و هەولێریش دەکەن بێدەنگ نەبن.

مەلا فەرمان یەکێک لەو رۆشنبیرانەى واژۆى لەسەر بانگەوازەکە کردووە، بەدەنگى ئەمەریکاى راگەیاند"قسەکانى باڵیۆزى تورکیا، دژى مادەى 140 و دەستوەردانیشە لە کاروبارى ناوخۆیى عێراق."

وتیشى"باڵیۆزى تورکیا بەو لێدوانەى بێ رێزى کرد بەرانبەر پێکهاتەکانى کەرکوک، هەوڵیدا ناکۆکیەکان زەق بکاتەوە و ئاشتى کۆمەڵایەتى بخاتە بەردەم مەترسیەوە."

باڵیۆزى تورکیا وێراى سەردانیکردنى پارێزگارى کەرکوک و ئەنجامدانى چەندین کۆبونەوە، رۆژێک پێش جەژن سەردانى قەزاى خورماتوى پارێزگاى سەڵاحەدینیشى کردبوو.

نەجات حسێن ئەندامى کوتلەى تورکمانى لەئەنجومەنى پارێزگاى کەرکوک، تیشکى خستە سەر ئامانجى سەردانەکەى باڵیۆزى تورکیا بۆ کەرکوک، ئاماژەى بەوەکرد پێشتر پارێزگارى کەرکوک بۆ ئەنجامدانى گرێبەست لەگەڵ چەند کۆمپانیایەکى تورکى دا، بەمەبەستى کردنەوەى فرۆکەخانە سەردانى تورکیاى کردبوو.

ناوبراو وتى"سەردانەکەى باڵیۆزى تورکیا بۆ مەسەلەى گرێبەستى نێوان کۆمپانیا تورکیەکان و ئیدارەى کەرکوک بوو."

وەسفکردنى کەرکوک بە خاکى باوباپیرانى لەلایەن بەرپرسەکەى تورکیاوە، لەکاتێکدایە کورد کەرکوک بە"قودسى کوردستان"ناودەبات، عەرەبیش ئەو شارە بە شارێکى عەرەبى دەزانێت.

please wait

No media source currently available

0:00 0:03:14 0:00

XS
SM
MD
LG