سەرۆکی تورکیا ڕەجەب تەیب ئەردۆگان بە سەرۆکی ئەنجومەنی ئەوروپا شاڕڵ میشێلی وت هەڵوێستی یەکێتیەکە بەرامبەر ڕۆژهەڵاتی دەریای ناوەڕاست تاقیکردنەوەیەک دەبێت بۆ ڕاستگۆیی یەکێتی ئەوروپا و داواشی لە یەکێتیەکە کرد هەڵوێستێکی بێلایەنیان هەبێت لە ناکۆکیەکانی نێوان تورکیا و یۆناندا.
یۆنان و تورکیا لە ڕووبەڕووبوونەوەیەکی گرژدان لە ڕۆهەڵاتی دەریای ناوەڕاست، لەکاتێکدا تورکیا هەوڵ دەدات لەو ناوچەیە نەوت و گاز دەربهێنێت و یۆنانیش خۆی بە خاوەنی ناوچەکە دەزانێت. ئانکەرە دەڵێت مافی تەواوی هەیە لە سەرچاوەکانی وزەی ناوچەکە و یۆنان تاوانبار دەکات بەوەی هەوڵ دەدات دەستبگرێت بەسەر ئەو سەرچاوانەدا.
ئۆفیسی سەرۆکی تورکیا لە زاری ئەردۆگانەوە بڵاویکردەوە هەڵسوکەوت و لێدوانەکانی سیاسەتمەدارانی ئەوروپا لە بابەتەکانی ئاسایشی ناوچەکەدا هیچ سوودێکیان نیە بۆ گەیشتن بە چارەسەر.
وتی " سەرۆک ئەردۆگان دەڵێت هەڵوێستی یەکێتی ئەوروپا بەرامبەر ڕۆژهەڵاتی دەریای ناوەڕاست تاقیکردنەوەیەک دەبێت بۆ ڕاستگۆیی یەکێتیەکە و جێبەجێکردنی یاسای نێودەوڵەتی و پابەندبوون بە ئاسایشی ناوچەکەوە."
وتیشی " سەرۆک داوای لە دامودەزگاکانی یەکێتی ئەوروپا و وڵاتانی ئەندام کردووە لە بابەتەکانی ناوچەکەدا بەتایبەتی ڕۆژهەڵاتی ناوەڕاست بەرپرسانە مامەڵە بکەن و بێلایەنانە بڕیار بدەن."
سەرچاوە/ ڕۆیتەرز