ئۆفیسی سەرۆک وەزیری بەڕیتانیا وتی بۆریس جۆنسن ئێوارەی ڕۆژی پێنجشەممە لە یەکەی چاودێری ورد دەرچووە و هێشتا لە نەخۆشخانە لەژێر چاودێری پزیشکەکاندایە.
ئێوارەی ڕۆژی یەکشەممە سەرۆک وەزیری بەڕیتانیا بۆریس جۆنسنی تەمەن 55 ساڵ بەهۆی بەرزبوونەوەی پلەی گەرمی لەشی و کۆکە بەهێزەکەیەوە کە بەهۆی ڤایرۆسی کۆرۆناوە توشی بووە، گواسترایەوە بۆ نەخۆشخانە و دواتر ڕۆژی دووشەممە بەهۆی خراپتربوونی باری تەندروستیەوە گواسترایەوە بۆ یەکەی چاودێری ورد و سێ شەو لەوێ مایەوە.
وتەبێژی ئۆفیسی سەرۆک وەزیری بەڕیتانیا وتی " سەرۆک وەزیر ئێوارەی ڕۆژی پێنجشەممە لە یەکەی چاودێری ورد گواستراوەتەوە بۆ ژوورەکەی خۆی لە نەخۆشخانە و لەوێش لەژێر چاودێری وردی پزیشکەکاندا دەبێت، هەروەها باری دەروونیشی باشە و لە قۆناغی سەرەتای چاکبوونەوەیدایە."
لەلای خۆیەوە سەرۆکی ئەمەریکا دانۆڵد ترامپ وتی " باشبوونی باری تەندروستی جۆنسن هەواڵێکی خۆشە."
سەرچاوە/ ڕۆیتەرز