بلومبێرگ نیوز لە زاری چەند کەسێکی نزیک لە بابەتەکەوە بڵاویکردەوە تایوان 400 موشەکی هارپوونی دژە کەشتی ئەمەریکی دەکڕێت بۆ ڕووبەڕووبوونەوەی زیادبوونی هەڕەشەکانی چین.
لە 7 ی مانگی چواردا وەزارەتی بەرگری ئەمەریکا گرێبەستێکی 1.7 ملیار دۆلاریی ڕاگەیاند بۆ 400 موشەکی دژە کەشتی، بەڵام ناوی کڕیارەکەی ئاشکرا نەکرد، وتی بەرهەمهێنانەکە پێشبینی دەکرێت لە مانگی سێی ساڵی 2029 دا تەواو ببێت، بلومبێرگ وتی کڕیارەکە تایوانە.
وەزارەتی بەرگری ئەمەریکا ڕەتی کردەوە ڕاستەوخۆ لێدوان لەسەر گرێبەستەکە بدات، بەڵام وتی " ئەمەریکا خزمەتگوزاری و پێویستییەکانی بەرگری دەخاتە بەردەستی تایوان تاوەکو تواناکانی بۆ بەرگریکردن لە خۆی بپارێزێت."
لە ساڵی 2020 دا تایوان وتی پلانی هەیە موشەکی هارپوونی دروستکراوی بۆینگ بکڕێت، وەکو بەشێک لە هەوڵەکانی بۆ نوێکردنەوەی سوپاکەی.
کاتێک سەبارەت بە هەواڵەکە پرسیاری لێکرا، وتەبێژی وەزارەتی دەرەوەی تایوان سون لی فانگ لە کۆنفرانسێکی ڕۆژنامەوانی ئاساییدا وتی وەزارەتەکە پێشتر زانیارییەکانی سەبارەت بە کڕینەکە بڵاوکردۆتەوە، وتیشی " متمانەی " بەوە هەیە کە گرێبەستەکە بەپێی ئەوەی پلانی بۆ داندراوە بەڕێوەبچێت.
لەم مانگەدا سەرۆکی ئەنجومەنی نوێنەرانی ئەمەریکا کێڤن مککارثی لە کالیفۆرنیا میوانداری سەرۆکی تایوان تسای ئینگ وێنی کرد و جەختی لە پێویستییەکان کردەوە بۆ خێراکردنی گەیاندنی چەکەکان بە تایوان لە نێوەندی زیادبوونی هەڕەشەکانی چیندا بۆ سەر دوورگەکە.
دوای کۆبوونەوەکە، مایک گالاگەری کۆماری و سەرۆکی لیژنەی دیاریکراوی ئەنجومەنەکە لەسەر پارتی کۆمیونیستی چینی وتی هەوڵ ڕێگەیەک بدۆزێتەوە تاوەکو موشەکەکانی هارپوون بدات بە تایوان پێش ئەوەی ئەو موشەکانە بدرێن بە سعودیە.
سەرچاوە/ ڕۆیتەرز