Accessibility links

شەڕی قورس لە نێوان دوو گروپی ئیسلامی ئۆپـۆزسیۆنی سوریا لە باکوری ڕۆژئاوای وڵاتەکە بەردەوامە


کۆمەڵەی سوریا بۆ چاودێری مافەکانی مرۆڤ دەڵێت شەڕی قورس لە نێوان دوو گروپی ئیسلامی لە باکوری ڕۆژئاوای سوریا بەردەوامە و ژمارەیەک کوژراون یان برینداربوون.

کۆمەڵەکە ئەمڕۆ دووشەممە ڕایگەیاند شەڕەکان لە ڕۆژی شەممەوە لە نێوان هەردوو گروپی جوند ئەلئەقسا و هەیئەت تەحریر ئەلشام هەڵگیرساوە و هەتا ئەمڕۆ بەردەوامیان هەبووە.

قورسترین شەڕیان لە ناوچە گوندیـیەکانی باشوری پارێزگای ئیدلیب و باکوری پارێزگای حەمای ڕوویانداوە، بە تایبەتی لە نزیک هەردوو شارۆچکەی خان شەیخون و ئەلتمانعە.

گروپی هەیئەت تەحریر ئەلشام توانیویەتی زۆربەی ناوچەکانی شارۆچکەی ئەلتمانعە کۆنترۆڵ بکات و گروپی جوند ئەلئەقسا دەستیگرتووە بەسەر بەشێـکی شارۆچکەی خان شەیخون. لە میانەی شەڕەکان ئۆتۆمبیلی بۆمبڕێژکراو و تەقینەوەی خۆکوژیـیان لە دژی یەکتر ئەنجامداوە.

لەوەتای حکومەتی سوریا شاری حەلەبی کۆنترۆڵکردووەتەوە و ئاگربەستەکە چووەتە قۆناغی جێبەجێکردنەوە، گروپەکانی ئۆپـۆزسیۆنی سوریا لە باکوری ڕۆژئاوای وڵاتەکە بوون بە چەندان بەش و هەر بەشەیان شەڕی ئەوانەی دیکە دەکات.

XS
SM
MD
LG