کۆمەڵەی سوریا بۆ چاودێری مافەکانی مرۆڤ دەڵێت لە پاش 20 ڕۆژ لە دەسـتپێـکردنی قۆناغی پـێنجەم و کۆتایی ئۆپەراسیۆنی غەزەبی فورات، هێزەکانی سوریای دیموکرات بە پاڵپشـتی هێزی تایبەتی ئەمەریکا و هێزی ئاسمانی هاوپەیمان توانیویانە 25% ی شاری ڕەققە لە داعش ڕزگاربکەن.
ڕامی عەبدولڕەحمان بەڕێوەبەری کۆمەڵەکە ئەمڕۆ دووشەممە بۆ ئاژانسی دەنگوباسی فڕانس پـرێس ڕاگەیاند و گوتی ئەو هێزانە توانیویانە هەردوو ناوچەی ئەلمەشلەب و ئەلسناعە لە باشوری ڕۆژهەڵاتی شارەکە و ئەلڕومانیە و ئەلسەباحیە لە ڕۆژئاوای شارەکە ڕزگاربکەن.
هەروەها توانیویانە کارگەی شەکری ڕەققە لەگەڵ بەشێـکی بنکەی جارانی فیرقەی 17 ی لەشکری سوریا کە دەکەونە باکوری شارەکەوە ئەوانیش ڕزگاربکەن.
هاوکات هێزەکانی سوریای دیموکرات ڕایگەیاند شەوی ڕابردوو یەکێـک لە هێڵە سەرەکیـیەکانی بەرگری داعشیان لە شارەکە شکاندووە و توانیویانە ناوچەی ئەلقادسیـیە ڕزگاربکەن کە دەکەوێتە ڕۆژئاوای شارەکە و چەند ناوچەیەکی گرنگ بە یەکەوە دەبەستێتەوە.
لە لایەکی دیکە شەڕی قورس لە باشوری شاری ڕەققە لە ئەوبەری ڕووباری فورات بەردەوامە و هێزەکانی سوریا دیموکرات توانیویانە ناوچەکانی جەزرە و شێخ ئەلجیمال و کەسرەت شێخ جومعە و کەسرەت فەرەج لە داعش ڕزگاربکەن، بەمەش نزیک دەبنەوە لەوەی بە تەواوی شارەکە لە دیوی باشوریشەوە لە ناوچەکانی دیکەی ژێر دەستی داعش داببڕن.