Accessibility links

کۆمەڵەی سوریا: هێزەکانی سوریای دیموکرات چوونە ناو شاری مەنبجەوە


کۆمەڵەی سوریا بۆ چاودێری مافەکانی مرۆڤ دەڵێت هێزەکانی سوریای دیموکرات ئەمڕۆ پـێنجشەممە چوونەتە نێو شاری مەنبجەوە و لە ئێسـتادا شەڕ کەوتووەتە نێو شارەکەوە.

ڕامی عەبدولڕەحمان بەڕێوبەری کۆمەڵەکە هەواڵەکەی بۆ ئاژانسی دەنگ‌‌وباسی فڕانس پـرێس ڕاگەیاند و گوتی ئەمڕۆ پـێنجشەممە بە پاڵپشـتی بۆردومانێـکی چڕی فڕۆکەکانی هاوپەیمانێتی بە ڕابەرایەتی ئەمەریکا، هێزەکانی سوریای دیموکرات لە بەرەی باشوری ڕۆژئاوای شارەکەوە چوونەتە ناوەوە و ئێسـتا شەڕ و پـێـکدادان کەوتوونەتە نێو بینا و جادەکانی شاری مەنبجەوە.

ئاماژەی بۆ ئەوەش کرد هەڵمەتەکە لە شەوی چوارشەممە لەسەر پـێنجشەممەوە دەسـتیپـێکردووە و سەرەتا هێزەکانی سوریای دیموکرات گوندی قەنات ئەلشێخ تەباشیان کۆنترۆڵکردووە کە لە باشوری ڕۆژئاوای شارەکەوەیە.

باسی لەوەش کرد کە لە ئێسـتادا شەڕەکان لە بەرەکانی باشور و باکور و ڕۆژئاوای شارەکە گەرمن و هێزکانی سوریای دیموکرات گوند بە گوند و کێڵگە بە کێڵگەی دەوروبەری شارەکە کۆنترۆڵ دەکەن تاوەکو گەمارۆی چەکدارانی داعش لە نێو شارەکە بدەن.

جێی ئاماژەیە هێزەکانی سوریای دیموکرات لە 31 ی مانگی پـێنجەوە ئۆپەراسیۆنی ڕزگاکردنی ناوچەی مەنبجیان دەسـتپـێکرد بە پاڵپشتی هێزی ئاسمانی هاوپەیمانان و ڕاوێژکاری سەربازانی تایبەتی ئەمەریکا. داعش لەوەتای ساڵی 2014 وە شاری مەنبجی داگیرکردووە و خاڵێـکی گرنگی بوو بەرەو سنوورەکانی تورکیا، بەڵام لە ئێسـتادا بە تەواوی گەمارۆدراوە.

XS
SM
MD
LG