Accessibility links

چاودێرانی نه‌ته‌وه‌ یه‌کگرتووه‌کان: شـارۆچکه‌ی حه‌فـفه‌ی سوریا چۆڵکراوه‌


ئه‌مڕۆ پـێـنجشه‌ممه‌ چاودێرانی نه‌ته‌وه‌ یه‌کگرتووه‌کان توانیان بچنه‌ ناو شـارۆچکه‌ی حه‌فـفه‌ پاش ئه‌وه‌ی هێزه‌کانی حکومه‌ت سه‌رهه‌ڵداوانیان له‌ شـارۆچکه‌که‌ وه‌ده‌رنا.

چاودێران ده‌ڵێن شـارۆچکه‌که‌ نیمچه‌ چۆڵکردنی ته‌واو کراوه‌ و باڵه‌خانه‌ حکومیـیه‌کان سوتێنراون و دوکان و بازاڕه‌کان زیانیان پـێـگه‌یشـتووه‌‌ و ته‌رمی کوژراوان له‌سه‌ر شه‌قامه‌کاندا که‌وتوون.

ده‌سه‌ڵاتدارانی سوریا دوێنێ چوارشه‌ممه‌ گوتیان شـارۆچکه‌که‌یان له‌ تاقمه‌ چه‌کداره‌ تێرۆرسـته‌کان پاکـکردووه‌ته‌وه‌. ڕۆژی سێشه‌ممه‌ش کۆمه‌ڵێـک ئاژاوه‌گێڕ له‌ ده‌روازه‌یه‌کی شـارۆچکه‌که‌ به‌ دار و به‌رد ڕووبه‌ڕووی ژماره‌یه‌ک ئۆتۆمبیلی چاودێران بوونه‌وه‌ و ڕێگه‌یان نه‌دا بچنه‌ ناو شـارۆچکه‌که‌.

له‌ لایه‌کی دیکه‌وه‌ وه‌ک ئاژانسی ده‌نگ‌وباسی ڕۆیته‌رز ده‌ڵێت هێزه‌کانی سوریا به‌ تۆپـی قورس شـاری دێر ئه‌زوری ڕۆژهه‌ڵاتی وڵاته‌که‌یان بۆردو‌مان کردووه‌ و له‌ ئاکامدا به‌ لایه‌نی که‌م 11 که‌س کوژراون و نزیکه‌ی 200 که‌سی دیکه‌ برینداربوون. سه‌رچاوه‌کانی ئۆپـۆزسیۆن ده‌ڵێن هه‌فته‌ی ڕابردوو له‌وێ چه‌کدارانی له‌شـکری سوریا ئازاد به‌ ده‌یان له‌ ئه‌ندامانی هێزه‌کانی حکومه‌تیان کوشـتووه‌ و چه‌ند تانک و ماشێنی له‌شـکریشیان تێـکشـکاندووه‌.

له‌ ڕیف دیمه‌شقیش خۆکوژێـک پاسێـکی بچوکی پـڕ ته‌قه‌مه‌نی له‌ ناوچه‌ی سه‌یده‌ زه‌ینه‌ب ته‌قاندووه‌ته‌وه‌ که‌ پـیرۆزترین مه‌زاری شیعه‌کانی سوریای لێـیه‌، وه‌ له‌ ئاکامدا 14 که‌س برینداربوون.

XS
SM
MD
LG