ڕۆژی دووشەممە سوپای سودان کودەتایەکی سەربازی بەسەر حکومەتی وڵاتەکەدا کرد و دەسەڵاتی گرتەدەست، بەرپرسانی تەندروستیش دەڵێن لەمیانەی پێکدادانەکانی نێوان سەربازەکانی سوپای سودان و خۆپیشاندەرەکاندا 7 کەس کوژراون و 140 کەسی دیکە برینداربوون.
ڕابەری کودەتاکە جەنەڕاڵ عەبدول فەتاح ئەل بورهان ئەنجومەنی سەروەری هاوبەشی مەدەنی و سەربازی وڵاتەکەی هەڵوەشاندەوە کە وابڕیاربوو سودان بەرەو دیموکراسیەت بەرێت.
بورهان باری نائاسایی لە وڵاتەکەدا ڕاگەیاند و وتی هێزە چەکدارەکانی پێویستیان بەوە بووە ئاسایش و سەلامەتی بپارێزن. بەڵێنیدا لە مانگی حەوتی ساڵی 2023 دا هەڵبژاردنێک ڕێکبخات و لەو کاتەدا دەسەڵات ڕادەستی حکومەتێکی هەڵبژێردراوی مەدەنی بکات.
وتی " ئەوەی ئێستا لە وڵاتەکەدا ڕوودەدات هەڕەشەیەکی مەترسیدارە بۆ سەر خەونی گەنجەکان و هیوای گەلەکە."
وەزارەتی زانیاری سودان کە هێشتا پشتیوانی لە سەرۆک وەزیری دەرکراوی سودان عەبدەڵا حەمدۆک دەکات وتی بەپێی دەستووری وڵاتەکە تەنها سەرۆک وەزیر دەتوانێت باری نائاسایی ڕابگەیەنێت و ڕەفتارەکانی سوپا تاوانن.
دیبلۆماتکارانیش دەڵێن پێدەچێت ڕۆژی سێشەممە ئەنجومەنی ئاسایشی نێودەوڵەتی سەر بە نەتەوە یەکگرتووەکان سەبارەت بە سودان کۆبوونەوەیەکی داخراو ئەنجام بدات.
وتەبێژی کۆشکی سپی کارین جین پیێر وتی " ڕەفتارەکانی سوپای سودان ڕەت دەکەینەوە و داوا دەکەین بەزووترین کات سەرۆک وەزیر و ئەوانی دیکەش ئازاد بکرێن."
گەنجانی وڵاتەکە دژایەتی کودەتا سەربازییەکەیان کرد و شەقامەکانی گرت و ڕووبەڕووی هێزە سەربازییەکان بوونەوە. حیزبی سەرەکی ئۆپۆزسیۆنی سودان کە پشتیوانی لە لەکارلابردنی عومەر بەشیری سەرۆکی پێشوو و پێکهێنانی ئەنجومەنی هاوبەشی سەربازی و مەدەنی سودان کرد، وتی داوا لە خەڵکەکە دەکەین بەشێوەیەکی ئاشتیانە ڕووبەڕووی کودەتاکەی سوپا ببنەوە، لەڕێی خۆپیشاندان و گرتنی شەقامەکانەوە.
وەزارەتی زانیاری سودان پشتیوانی لە خۆپیشاندانەکان کرد و وتی دەیان هەزاران کەس دژی کودەتاکەن و ڕژاونەتە سەر شەقامەکان و ڕووبەڕووی تەقە بوونەتەوە لەلایەن هێزەکانی سوپاوە. هەروەها کارمەندانی بانکی ناوەندیش وەکو ناڕەزایی دەربڕینێک بۆ کودەتاکە، مانیان لە کارکردن گرتووە.
سەرچاوە/ ڕۆیتەرز