کاربەدەسـتانی سۆماڵ دەڵێن ژمارەیەک چەکدار هێرشیان کردووەتە سەر هوتێلێـک لە مەقدیشۆی پایتەخت و لە ئاکامدا بە لایەنی کەم 15 کەس کوژراون.
بەیانی ئەمڕۆ چوارشەممە هێرشبەرەکان سەرەتا ئۆتۆمبیلێـکی بۆمبڕێژکراویان بە دەروازەی هوتێلەکە تەقاندەوە و بە دوایدا چەکدارەکان پەلاماری ناو هوتێلەکەیان دا کە کەسانی سیاسی لێی دادەبزن. پاشان لەگەڵ گەیشتنی هێزەکانی ئاسایش و ڕۆژنامەوانان بۆ ناوچەکە تەقینەوەیەکی دیکە ڕوویدا و لە ئاکامدا ژمارەیەک لە ڕۆژنامەوانان برینداربوون، لەوانە وێنەگرانی ئاژانسی فڕانس پـرێس و کەناڵی ئەلعەرەبیـیە.
عەبدول ڕەزاق عومەر وەزیری ئاسایشی سوماڵ بۆ ڕۆژنامەوانانی ڕاگەیاند بەپـێی ئامارە سەرەتایـیەکان 15 کەس کوژراون کە بریتین لە 4 ئەندامی هێزەکانی ئاسایش و 11 کەسی سڤیل و هەروەها 51 کەسیش برینداربوون.
عەبدول قادر حسێن عەقیدی پـۆلیس لە مەقدیشۆ بە ئاژانسی دەنگوباسی ڕۆیتەرزی گوت هێزەکانی ئاسایش توانیان کۆتایی بە هێرشەکە بهێنن و لە ئێستادا هوتێلەکە لە ژێر کۆنترۆڵی پـۆلیسدایە.
بزوتنەوەی شەبابی سوماڵی کە لە نێو لیستی ڕێکخراوە تێرۆرستیـیەکاندایە، لە ڕێگەی ئیزگەکەیەوە بەرپـرسیارێتی خۆی لە هێرشەکە ڕاگەیاند.