داعش وێنەیەکی بڵاوکردووەتەوە و دەڵێت بەو کەرەسـتانە ئەو بۆمبەیان دروسـتکردووە کە لە تەقاندنەوەی ئەو فڕۆکە ڕووسیـیە بەکاریانهێناوە کە لە سینای میسر کەوتە خوارێ و تیایدا 224 کەس گیانیان لەدەسـتدا کە 17 کەسیان منداڵ بوون.
ڕۆژی چوارشەممە داعش لە گۆڤارەکەی خۆی بە ناوی دابق کە بە زمانی ئینگلیزی بڵاوی دەکاتەوە، ئەمەی ڕاگەیاند و نووسیویەتی ڕێگەیەکی دۆزیوەتەوە بۆ بەزاندنی ڕێوشوێنە ئاسایشیـیەکان لە فڕۆکەخانەی شەرم ئەلشێخ لە میسر.
ئاماژەیان بۆ ئەوە کردووە کە بە نیازبوون فڕۆکەیەکی ئەمەریکا بکەنە ئامانج، بەڵام دواتر پـلانەکەیان گۆڕیوە و فڕۆکەیەکی ڕووسیایان دەسـتنیشانکردووە پاش ئەوەی ڕووسیا لە مانگی نۆوە دەسـتیکرد بە بۆردومانکردنی شوێنەکانیان لە سوریا.
لە وێنەکە قتویەکی سۆدا و کەپـسولێـکی تەقینەوەیان نیشـانداوە لەگەڵ شتێـک بە تێپی ڕەش پـێچراوە و سویچێـکی پـێوەیە و وایەری لێهاتووەتە دەرێ. هەروەها وێنەی چەند پاسپـۆرتێـکیان بڵاوکردووەتەوە و نووسیویانە ئەمانە هی سەرنشینە ڕووسیـیەکانی نێو فڕۆکەکەن.
جێی ئاماژەیە دەزگای ئاسایشی فیدراڵی ڕووسیا ڕۆژی سێشەممە ڕایگەیاند لێکۆڵینەوەکان نیشـانیانداوە بە بۆمبێـکی دەسـتکرد فڕۆکەکە خراوەتە خوارێ.