وەزیری دەرەوەی قەتەڕ شێخ محەمەد بن عەبدولڕەحمان ئال ثانی وتی وڵاتانی کەنداو و ئێران پێویستیان بەوەیە لەسەر شێوازێکی گفتوگۆکردن ڕێکبکەون تاوەکو نیگەرانییەکان نەمێنن و گرژییەکانی ناوچەکە کەم بکرێنەوە.
وەزیری دەرەوەی قەتەڕ لە هەمان کاتیشدا پێشوازی لە هەنگاوەکانی تورکیای هاوپەیمانی قەتەڕ کرد بۆ کەمکردنەوەی گرژییەکان لەگەڵ سعودیە و میسڕدا و داوای لە دوو وڵاتە عەرەبییەکە کرد بەردەوام بن لە گفتوگۆکردن لەگەڵ تورکیادا.
شێخ محەمەد بە ڕۆیتەرزی وت " ناوچەکە پێویستی بەوەیە هەست بە هەندێک لە سەقامگیری بکات و پێویستی بەوەیە سەرجەم یاریکەرەکانی ناوچەکە هەوڵی کەمکردنەوەی گرژییەکان بدەن."
وابڕیارە هەفتەی داهاتوو وەزیری دەرەوەی تورکیا سەردانی سعودیە بکات، ئەم سەردانەش دوای دانوستانەکانی نێوان تورکیا و میسڕ دێت کە ئامانج لێی ئاساییکردنەوەی پەیوەندییەکانی نێوانیان بوو.
وەزیری دەرەوەی قەتەڕ وتیشی " من دڵنیام لەوەی ئەگەر سەرجەم لایەنەکان پێکەوە دابنیشن ئەوا کاریگەرییەکی زۆری لەسەر سەقامگیریی ناوچەکە دەبێت."
سەرچاوە/ ڕۆیتەرز