Accessibility links

پەمپیۆ: سزاکانی سەر پیۆنگیانگ بەردەوام دەبن تاوەکو بەتەواوەتی چەکە ناوەکییەکەی نامێنێ


وەزیری دەرەوەی ئەمەریکا مایک پەمپیۆ لەگەڵ وەزیری دەرەوەی ژاپۆن تارۆ کۆنۆ

وەزیری دەرەوەی ئەمەریکا مایک پەمپیۆ وتی سزا توندەکانی سەر کۆریای باکوور بەردەوام دەبن تاوەکو بەتەواوەتی دەستبەرداری چەکە ناوەکییەکەی دەبێت.

جێی ئاماژەیە سەرۆکی ئەمەریکا دانۆڵد ترامپ و ڕابەری کۆریای باکوور کیم جۆنگ ئون بەیاننامەیەکی هاوبەشیان دەرکرد دوای کۆبوونەوەکەیان لە سینگافور و تیایدا جەخت لە پابەندبوونی کۆریای باکوور دەکاتەوە بۆ کارکردن بەرەو نەهێشتنی تەواوەتی چەکی ناوەکیی لە نیچە دوورگەی کۆریادا. هەروەها لەبەرامبەردا ئەمەریکا واز لە مەشقە سەربازییە هاوبەشەکانی لەگەڵ کۆریای باشووردا دەهێنێت و گرەنتی ئاسایش دەداتە پیۆنگیانگ.

پەمپیۆ دوای کۆبوونەوەکەی لەگەڵ سەرۆکی کۆریای باشوور و وەزیری دەرەوەی ژاپۆن لە سیئۆل وتی " سەرۆک ترامپ زۆر ڕوون بووە سەبارەت بە نەهێشتنی چەکی ناوەکیی و لابردنی سزاکان."

وتیشی " چەکی ناوەکیی بەتەواوەتی ناهێڵرێت، لەو کاتەدا کەمکردنەوەی سزاکان دەبێت."

دەزگاکانی ڕاگەیاندنی کۆریای باکوور وتیان سەرۆک ترامپ و کیم بنەمای جووڵەی هەنگاو بە هەنگاو و بە هەماهەنگی دەزانن، بۆ دەستەبەرکردنی ئاشتی و نەهێشتنی چەکی ناوەکی لە نیمچە دوورگەی کۆریادا.

سەرچاوە/ ڕۆیتەرز

XS
SM
MD
LG