Accessibility links

پاکسـتان ده‌ڵێت ملیاره‌ها دۆلار پـێویسته‌ بۆ بنیادنانه‌وه‌ی وڵاته‌که‌ له‌ پاش لافاوه‌کاندا


باڵیۆز زامیر ئه‌کره‌م له‌ میانه‌ی کۆنگریه‌کی ڕۆژنامه‌وانیدا له‌ جنێڤ، سێشه‌ممه‌ 17 ی هه‌شتی 2010
باڵیۆز زامیر ئه‌کره‌م له‌ میانه‌ی کۆنگریه‌کی ڕۆژنامه‌وانیدا له‌ جنێڤ، سێشه‌ممه‌ 17 ی هه‌شتی 2010

نێردراوی تایبه‌تی پاکسـتان بۆ نه‌ته‌وه‌ یه‌کگرتووه‌کان ده‌ڵێت وڵاته‌که‌ی پـێویسـتی به‌ ملیاره‌ها دۆلار ده‌بێت‌ بۆ بنیادنانه‌وه‌‌، ئه‌ویش به‌هۆی ئه‌و لافاوانه‌ی که‌ ناوچه‌یه‌کی به‌رینی گرته‌وه‌ و ژێرخانی وڵاته‌که‌ی وێرانکرد.

ڕۆژی سێشه‌ممه‌ له‌ جنێڤ باڵیۆز زامیر ئه‌کره‌م گوتی ته‌نها هه‌ر بۆ ئاوه‌دانکردنه‌وه‌ی ناوچه‌کانی باکوری وڵاته‌که 2.5 ملیار دۆلار پـێویسته‌.

باڵیۆز زامیر پـێشـبینی ده‌کات به‌ لایه‌نی که‌م 5 سـاڵ پـێویست بێت بۆ چاکردنه‌وه‌ی و بنیادنانه‌وه‌ی ئه‌و ناوچانه‌ی به‌هۆی لافاوه‌کانه‌وه‌ زیانیان پـێـگه‌یشـتووه‌.

هه‌روه‌ها ئاگاهی دا به‌وه‌ی وێرانبوونی ناوچه‌یه‌کی گه‌وره‌ی کشـتوکاڵی وڵاته‌که‌ و له‌ناوچوونی به‌روبوومی جوتیاران ده‌بێته‌ مایه‌ی که‌می خۆراک و بڵاوبوونه‌وه‌ی بـێـکاری و هه‌ژاری.

نێردراوه‌که‌ی پاکسـتان داوای کۆمه‌کی نێونه‌ته‌وه‌یی زیاتریشی بۆ ئه‌و ملیۆنه‌ها پاکسـتانیـیه‌ کرد که‌ ماڵ و حاڵیان به‌ لافاوه‌کان وێرانبووه‌.

هه‌ر ڕۆژی سێشه‌ممه‌ کاربه‌ده‌سـتانی نه‌ته‌وه‌ یه‌کگرتووه‌کان گوتیان ته‌نها به‌شێـکی ئه‌و 6 ملیۆن پاکسـتانیـیه‌ی پـێویسـتیان به‌ خۆراک و ئاوی خاوێن هه‌یه‌ کۆمه‌کیان وه‌رگرتووه‌. نه‌ته‌وه‌ یه‌کگرتووه‌کان داوا له‌ وڵاتان ده‌کات ئه‌و به‌ڵێنانه‌ی داویانه‌ بۆ یارمه‌تیدانی خه‌ڵکی پاکستان به‌جێی بگه‌یه‌نن. تا ئێسـتا نه‌ته‌وه‌ یه‌کگرتووه‌کان نزیکه‌ی 35 % ئه‌و 460 ملیۆن دۆلاره‌ی پـێـگه‌یشـتووه‌ که‌ هه‌فته‌ی ڕابردوو داوای کردبوو.

XS
SM
MD
LG