Accessibility links

شێروان میرزا: لایەنە عێراقییەکان داوای لەوە زیاتر دەکەن کەهەرێم ئامادەیی خۆی دەربڕیووە


شێروان میرزا ئەندامی لیژنەی کاروباری دارایی و ئابووری لەپەرلەمانی عێڕاق

شێروان میرزا ئەندامی لیژنەی کاروباری دارایی و ئابووری لەپەرلەمانی عێڕاق لەسەر فراکسیۆنی یەکێتی نیشتمانی کوردستان دەڵێت." له‌ڕاستیدا به‌بێ ڕێككه‌وتن هێزه‌ سیاسیه‌كان به‌گشتی و هێزه‌ سیاسییه‌ شیعه‌كان به‌تایبه‌تی فشارێكی زۆریان له‌به‌ڕێز كازمی و له‌حكومه‌تی عێراقی كردووه‌ كه‌به‌بێ ڕێككه‌وتن هیچ بڕه‌پاره‌یه‌ك بۆ هه‌رێمی كوردستان نه‌نێرێت ته‌نانه‌ت یاسای پڕكردنه‌وه‌ی كورتهێنانی دارایی كه‌ له‌مانگی 10 ده‌نگی له‌سه‌ردرا، حكومه‌تی هه‌رێمی كوردستان ئاماده‌یی تێدابوو هه‌موو بڕگه‌كانی جێبه‌جێبكات، جارێكی تر فشاری هێزه‌ سیاسیه‌كان له‌سه‌ر كازمی و له‌سه‌ر حكومه‌ته‌كه‌ی وایانكرد كه‌هیچ بڕه‌پاره‌یه‌ك بۆ هه‌رێمی كوردستان نه‌نێرێت، دەشڵێت" لەئێستادا سەقفی داواکاری لایەنە عێراقیەکان بەرامبەر هەرێمی کوردستان زیاتر بەرزبۆتەوە بەجۆرێک داوای ڕادەستکردنی هەموو مەلەفی نەوتی هەرێم دەکەن کە ئەوەش داواکارییەکی نادەستورییە."

"نەبێ ئومێدبووین نەڕێکیش کەوتووین"

لەسەرەتای وتوێژەکەدا ئەندامەکەی لیژنەی دارایی و ئابوری پەرلەمانی عێراق وەڵامی ئەو پرسیارەی دایەوە تاچەند مەترسی هەیە هەندێک دەڵێن کە مەترسی هەیە پڕۆژە یاسای بودجە ئەمساڵ بێ کورد لەپەرلەمانی عێراق تێپەڕێنرێت یاخود وەک هەندێکی تر دەڵێن بێ کورد پڕۆژە یاساکە تێناپەڕێنرێت؟

لەوەڵامدا شێروان میرزا دەڵێت" له‌ڕاستیدا ده‌كرێت بڵێین له‌ناوه‌ڕاستی هه‌ردوو بۆچوونه‌كه‌داین، نه‌ئه‌وه‌یه‌ بێ ئومێد بووبین له‌ڕێككه‌وتن به‌وه‌ی كه‌پێمان وانییه‌ ئه‌مجاره‌ بیانه‌وێت به‌بێ كورد پڕۆژه‌ یاساكه‌ تێپه‌ڕێنن، نه‌گه‌یشتوینه‌ ئه‌م حاڵه‌ته‌، وه‌ ڕێكیش نه‌كه‌وتووین به‌وه‌ی كه‌دڵنیابین له‌وه‌ی له‌سه‌ر ده‌قێك ڕێككه‌وتبێتین و بڵێین ئه‌مه‌ وه‌كو خۆی ده‌ڕوات له‌په‌رله‌مان، له‌ڕاستیدا له‌م ماوه‌یه‌دا ئێمه‌ هه‌موو ئه‌ندامه‌ كورده‌كانی لیژنه‌ی دارایی جه‌ختمان له‌وه‌كردۆته‌وه‌ له‌گه‌ڵ چاره‌سه‌ری ده‌ستوریین، له‌گه‌ڵ چاره‌سه‌رێكین كه‌ قابیلی جێبه‌جێكردن بێت، وه‌ پێشمان وایه‌ ئه‌و ده‌قه‌ی له‌حكومه‌ته‌وه‌ هاتووه‌ ده‌قێكی باشه‌ به‌وپێیه‌ی كه‌هه‌ردوو حكومه‌ت له‌سه‌ری ڕێككه‌وتوون و قابیلی جێبه‌جێكردنه‌."

"لایه‌نه‌ شیعه‌كان چه‌ند پێشنیارێكیان هێناوه‌ "

شێروان میرزا ئەوەشی وت" له‌به‌رامبه‌ردا هه‌موو لایه‌نه‌كان به‌تایبه‌تی لایه‌نه‌ شیعه‌كان چه‌ند پێشنیارێكیان هێناوه‌، ئێمه‌ هه‌ندێك له‌و پێشنیارانه‌مان ره‌تكردۆته‌وه‌ به‌و پێیه‌ی پێمان وابووه‌ ناده‌ستورییه‌، بۆ نموونه‌ ڕاده‌ستكردنی هه‌موو مه‌له‌فی نه‌وت بەعێراق به‌بێ ئه‌وه‌ی هه‌رێم به‌شداربێت یان ڕاده‌ستكردنی كێڵگه‌ نه‌وتییه‌كان به‌بێ هه‌رێم، ئه‌مانه‌ هه‌مووی ناده‌ستوریین و ناواقیعین ئه‌مانه‌مان هه‌مووی ڕه‌تكردۆته‌وه‌. دواپێشهات ئه‌وه‌یه‌ ئێمه‌ چاوه‌ڕێی لایه‌نه‌ شیعه‌كان ده‌كه‌ین ئه‌گه‌ر به‌و ده‌قه‌ی كه‌حكومه‌ت له‌ناو پرۆژه‌یاساكه‌دا ناردوویه‌تی ڕازی نیین، باده‌قێك بهێنن كه‌قابیلی جێبه‌جێ كردن بێت و ده‌ستوری بێت هه‌تا گفتوگۆی لەسەر بكه‌ین له‌ڕاستیدا تائێستا ده‌قێك نه‌هاتووه‌ كه‌ ناوماڵی شیعه‌ به‌گشتی له‌سه‌ری كۆك بێت تا ئێمه‌ گفتوگۆی لەسەر بكه‌ین."

"لایەنە عێراقیەکان داوای لەوە زیاتر دەکەن کەهەرێم ئامادەیی خۆی دەربڕیووە لەڕادەستکردنی"

بەڵام خۆ هەریەک لەسەرۆکی حکومەت و جێگری سەرۆکی حکومەت لەپێشتردا ڕایانگەیاند لەگەڵ حکومەتی عێراقی لەسەر پڕۆژە یاسای بودجە ڕێککەوتوون؟ لەوەڵامدا شێروان میرزا وتی" كێشه‌كه‌ له‌و بڕه‌ نه‌وته‌دایه‌ كه‌هه‌رێمی كوردستان ئاماده‌یی هه‌یه‌ بیداته‌ كۆمپانیای سۆمۆ، بیداته‌ عێراق كه‌عێراقییه‌كان داوای له‌وه‌ زیاترده‌كه‌ن، قسه‌كانی سه‌رۆكی حكومه‌ت و جێگری سه‌رۆكی حكومه‌ت ته‌نانه‌ت پێرێش "به‌ڕێز موسته‌فا كازمی" باسی له‌وه‌كرد كه‌ئه‌وان بۆیه‌ ئه‌و ده‌قه‌یان ناردووه‌ له‌ناو پرۆژه‌ یاساكه‌دا له‌به‌رئه‌وه‌ی له‌گه‌ڵ حكومه‌تی هه‌رێم ڕێككه‌وتوون له‌سه‌ری، وه‌ دووجار تكای كرد كه‌ئه‌م ده‌قه‌ وه‌كو خۆی بڕوات چونكه‌ قابیلی جێبه‌جێكردنه‌، له‌گه‌ڵ حكومه‌تی هه‌رێمی كوردستان ڕێككه‌وتوون له‌سه‌ری، ڕاسته‌ هه‌ردوو حكومه‌ت ڕێككه‌وتوون به‌ڵام دواجار ئه‌مه‌ دێته‌ په‌رله‌مان، وه‌ له‌په‌رله‌مان نوێنه‌رایه‌تی هێزه‌ سیاسیه‌كان و كوتله‌ سیاسیه‌كان ده‌كات."

" هیوای ئه‌وه‌ ده‌خوازین كه‌نه‌گه‌ینه‌ ئه‌و حاڵه‌ته‌ی كه‌ ڕێكنه‌كه‌وین "

"گرفتی ئه‌م پرۆژه‌ یاسایه‌ ئه‌وه‌یه‌ كه‌هی پێش هه‌ڵبژاردنه‌، پێش هه‌ڵبژاردن موزایه‌دات زیاد ده‌كات په‌رله‌مانتار و كوتله‌ی سیاسی بۆ شه‌قام قسه‌ ده‌كات ئه‌مه‌ وایكردووه‌ تۆزێك هێزه‌ سیاسیه‌كان به‌وه‌ ڕازی نه‌بن و سه‌قفی داواكارییه‌كانیان زیاد بكات به‌رامبه‌ر كورد، وه‌ كوردیش له‌به‌رامبه‌ردا پێداگری له‌سه‌ر ئه‌م ده‌قه‌ی حكومه‌ت ده‌كات كه‌ هه‌یه‌."شێروان میرزا ئەندامی لیژنەی دارایی لەپەرلەمانی عێراق وایوت"

شێروان میرزا ئەوەشی وت" ئێمه‌ هیوای ئه‌وه‌ ده‌خوازین كه‌نه‌گه‌ینه‌ ئه‌و حاڵه‌ته‌ی كه‌ ڕێكنه‌كه‌وین تائێستا ئومێدمان به‌وه‌ ماوه‌ كه‌ بگه‌ینه‌ ڕێككه‌وتن و بگه‌ینه‌ ده‌قێكی ته‌وافقی به‌ڵام له‌عێراق له‌سیاسه‌تدا هه‌موو ئه‌گه‌ره‌كان كراوه‌یه‌، وه‌ ڕێكنه‌كه‌وتنی هه‌رێم و به‌غداد یه‌كێكه‌ له‌و ئه‌گه‌رانه‌ هه‌رچه‌ند به‌دووری ده‌بینیین به‌ڵام له‌م حاڵه‌ته‌دا حكومه‌تی هه‌رێمی كوردستان ده‌بێت هه‌نگاو بنێت به‌ چاكسازی ڕاسته‌قینه‌ به‌وه‌ی كه‌هه‌م داهاته‌كانی زیاد بكات و هه‌م خه‌رجیه‌كانی كه‌م بكات و خه‌رجی ناپێویست لابدات، وه‌ به‌گرێبه‌سته‌كانی نه‌وتدا بچێته‌وه‌ له‌گه‌ڵ كۆمپانیاكان به‌گرێبه‌ستی ناردنی نه‌وت به‌بۆری توركیادا بچێته‌وه‌ كه‌پاره‌یه‌كی زۆر ده‌دات هه‌موو ئه‌وانه‌ پێویستی به‌چاكسازی ڕاسته‌قینه‌ هه‌یه‌ بۆئه‌وه‌ی داهاته‌كانی زیاد بكات و خه‌رجییه‌كانی كه‌م بكات، ئه‌و بڕه‌ پاره‌یه‌ی كه‌ده‌ستی ده‌كه‌وێت بتوانێت ئیداره‌ی خۆی پێ بدات."

"لەحاڵەتی ڕێکنەکەوتندا هەرێم و بەغداد هەردوولایان زیان دەکەن "

میرزا دەشڵێت" هاوڵاتیانی كوردستان و فه‌رمانبه‌رانی كوردستان زیان ده‌كه‌ن له‌حاڵه‌تی ڕێكنه‌كه‌وتندا، جگە لەوەش هه‌ردوولا (حکومەتی عێراق و حکومەتی هەرێم) زیانمه‌ندده‌بن وه‌كو حكومه‌ت له‌به‌رئه‌وه‌ی حكومه‌تی عێراقی هه‌لێك هاتۆته‌ پێش كه‌كورد به‌هێزه‌وه‌ گه‌ڕاوه‌ته‌وه‌ به‌غداد و بیه‌وێت له‌گه‌ڵ به‌غداد ڕێكبكه‌وێت، ئه‌گه‌ر ئه‌م ده‌رفه‌ته‌ له‌ده‌ست بچێت له‌وانه‌یه‌ ڕێكه‌وتنی نێوان هه‌رێم و به‌غداد له‌سه‌ر زۆر بابه‌تی تر ئاڵۆز ببێت، وه‌ جارێكی دیكه‌ هاوڵاتیانی كوردستان پێیان وابێت كه‌ هاوڵاتی عێراقی نیین به‌ره‌و لێكترازانی زیاتر بڕۆین، سه‌باره‌ت به‌هه‌رێمی كوردستان ساڵێكی قورس ده‌بێت به‌و پێیه‌ی وه‌كو باسمانكرد ده‌بێت چاكسازی ڕاسته‌قینه‌ بكات ئه‌گه‌ر ناتواتێت ئیداره‌ی بارودۆخی دارایی خۆی و دابینكردنی مووچه‌ی فه‌رمانبه‌ران بكات به‌شێوه‌یه‌كی دروست و ڕاسته‌قینه‌ كه‌واته‌ وه‌كو حكومه‌ت له‌م هه‌نگاوه‌ هه‌ردوولا زیانمەند ده‌بن."

"ئەوەی بەغداد داوای دەکات پێچەوانەی دەستورە "

شێروان میرزا زیاتر ڕوونیکردەوە" ئه‌وه‌ی هه‌رێمی كوردستان ده‌ڵێت 250 هه‌زار به‌رمیل نه‌وت ڕاده‌ست ده‌كه‌م زۆر واقیعیه‌ له‌به‌رئه‌وه‌ی هه‌نارده‌ی نه‌وتی هه‌رێمی كوردستان 433 هه‌زار به‌رمیل نه‌وته‌ به‌تێكڕا بابڵیین 430 هه‌زاره‌، له‌م 430 هه‌زاره‌، 180 -190 هه‌زار به‌رمیلی جاری واهه‌یه‌ زیاتریش تێچووی نه‌وته‌، واته‌ تێچووی ده‌رهێنان و هه‌نارده‌كردن و په‌ره‌پێدانی كێڵگه‌كانی نه‌وته‌ واته‌ موسته‌حقاتی كۆمپانیاكانه‌ ئه‌وه‌ی كه‌ده‌درێت به‌كۆمپانیاكان و تێچووی نه‌وت، ئه‌وه‌ی ده‌مێنێته‌وه‌ 250 هه‌زار به‌رمیل نه‌وته‌، حكومه‌تی هه‌رێمی كوردستان ئاماده‌یی هه‌یه‌ وه‌ "به‌ڕێز كاك قوباد" له‌ناو لیژنه‌ی دارایی له‌گه‌ڵ هێزه‌ سیاسیه‌ عێراقییه‌كان و له‌ناو په‌رله‌مان ڕایگه‌یاندووه‌ كه‌ئه‌وان ئاماده‌ن 250 هه‌زار به‌رمیل نه‌وت چ به‌نه‌وت عێراق بیه‌وێت چ به‌نرخی نه‌وته‌كه‌ بیه‌وێت ته‌نانه‌ت به‌نرخی سۆمۆش بیه‌وێت ئاماده‌ن ڕاده‌ستی عێراقی بكه‌ن به‌ڵام عێراقییه‌كان سه‌قفی داواكاریان زیادكردووه‌ به‌وه‌ی كه‌داوای هه‌موو مه‌له‌فی نه‌وت ده‌كه‌ن، واته‌ نه‌وت له‌بنده‌ستی هه‌رێمی كوردستان ده‌ربهێنن یان داوای كێڵگه‌كانی نه‌وت ده‌كه‌ن كه‌ ئه‌مه‌ پێچەوانەی مادده‌ی 112 ی ده‌ستوره‌ كه‌باس له‌وه‌ده‌كات كێڵگه‌ نه‌وتییه‌كان به‌هاوبه‌شی به‌ڕێوه‌ده‌برێن، وه‌داهاتی نه‌وت هی هه‌موو عێراقییه‌كانه‌."

"به‌بێ ڕێككه‌وتن حكومه‌تی عێراقی هیچ بڕه‌پاره‌یه‌ك بۆ هه‌رێمی كوردستان نانێرێت "

لەوەڵامی ئەو پرسیارەی ئایا حکومەتی عێراقی بەبێ ڕێککەوتن هیچ بڕە پارەیەک بۆ هەرێم دەنێرێت لەوەڵامدا وتی" له‌ڕاستیدا به‌بێ ڕێككه‌وتن هێزه‌ سیاسیه‌كان به‌گشتی و هێزه‌ سیاسییه‌ شیعه‌كان به‌تایبه‌تی فشارێكی زۆریان له‌به‌ڕێز كازمی و له‌حكومه‌تی عێراقی كردووه‌ كه‌به‌بێ ڕێككه‌وتن هیچ بڕه‌پاره‌یه‌ك بۆ هه‌رێمی كوردستان نه‌نێرێت ته‌نانه‌ت یاسای پڕكردنه‌وه‌ی كورتهێنانی دارایی كه‌ له‌مانگی 10 ده‌نگی له‌سه‌ردرا، حكومه‌تی هه‌رێمی كوردستان ئاماده‌یی تێدابوو هه‌موو بڕگه‌كانی جێبه‌جێبكات، جارێكی تر فشاری هێزه‌ سیاسیه‌كان له‌سه‌ر كازمی و له‌سه‌ر حكومه‌ته‌كه‌ی وایانكرد كه‌هیچ بڕه‌پاره‌یه‌ك بۆ هه‌رێمی كوردستان نه‌نێرێت."

شێروان میرزا جەختیکردەوە" ئه‌وه‌ی ئێمه‌ پێشبینی ده‌كه‌ین تائێستا له‌ناو لیژنه‌ی دارایی و له‌ناو هێزه‌ سیاسیه‌كان ئه‌وه‌یه‌ كه‌ به‌بێ ڕێككه‌وتن حكومه‌تی عێراقی هیچ بڕه‌پاره‌یه‌ك بۆ هه‌رێمی كوردستان نانێرێت."

please wait

No media source currently available

0:00 0:07:13 0:00



XS
SM
MD
LG