دوای ئەوەی لە چەند رۆژی ڕابردوودا کۆمەڵی ئیسلامی ئۆپۆزسیۆنبوونی خۆی راگەیاند، ئەمە کاردانەوەی جیا جیای لێکەوتەوە، لەم بارەیەوە رێبوار حەمەد گوتەبێژی کۆمەڵی ئیسلامی لە گوتووێژێکی دەنگی ئەمریکادا گوتی: ئێمە پرسی بەشداریکردن یان بەشدارینەکردنی کۆمەڵی ئیسلامیمان بۆ ماوەیەکی باش بە کراوەیی ھێشتەوە و ویستمان گفتوگۆی جدی لەبارەی بەشداریکردنمان لە حکومەتی ھەرێمدا بکەین، وە ببینین ئەگەر ئەم حکومەتە ببێتە حکومەتی خزمەتگوزاری و خواستی خەڵکی تێدا جێبێتەوە و جیاواز بێت لە کابینەکانی پێشوو، ئێمەش ھاوبەش بین لە ناویدا. بەڵام ئێمە دواکەوتنی کابینەی حکومەت و ململانێی نێوان حزبەکانمان بینی، بۆیە بڕیارماندا ببینە ئۆپۆزیسیۆن و پرسی بەشداریکردنمان لە حکومەت کۆتایی پێھێنا.
لە وەڵامی پرسیاری ئەوەیش کە ئایا ھیچ جارێک لە لایەن پارتی دیموکراتی کوردستانەوە پێشنیاری ئەوەیان بۆ کراوە کە بەشداری لە حکومەتدا بکەن گوتی: ئەوەی راستی بێت ئێمە چەند کۆبوونەوەیکمان کردووە بەڵام تاوەکو ئێستا چ لە لایەن کۆمەڵ و چ لەلایەن پارتییەوە قسەی جدی بۆ بەشداریکردنمان لە حکومەتدا نەکراوە.
تەواوی گوتووێژەکە لەم فایلە دەنگییەی خوارەوە، گوێبیست بن.
