Accessibility links

وتەبێژى یەکێتى: قسەکانى دکتۆر کەمالى کەرکوکى لەبارەى کەرکوکەوە گومانى لادروست کردووین


وتەبێژى یەکێتى نیشتیمانى کوردستان، دەڵێت گەر ئەو قەناعەتەیان لا دروست ببێت کە پارتى رێککەوتنەکانى نێوانیان جێبەجێ دەکات، بەشدارى لە بۆنەى سوێند خواردنى سەرۆکى هەرێمى کوردستاندا دەکەن کە نێچیرڤان بارزانى یە.

لە چاوپێکەوتنێکدا لەگەڵ دەنگى ئەمەریکا، لەتیف شێخ عومەر وتى"ئێمە بەپەرۆشى و دڵسۆزیەکى گەورەوە لەهەنگاوەکانى پێکهێنانى حکومەت دا بەشدار دەبین، گەر ئەو قەناعەتەمان لادروست ببێت کە پارتى رێککەوتنەکان جێبەجێ دەکات."

ئەگەرچى هەندێک زانیارى لەبارەى ئەنجامدانى کۆبوونەوەى دوو قۆڵى لەنێوان یەکێتى و پارتى لە ڕۆژانى داهاتوو بڵاوکراونەتەوە، بەڵام وتەبێژەکەى یەکێتى دەڵێت"هێشتا وادەى کۆبونەوە دانەنراوە، بەڵام پەیوەندى بەردەواممان لەگەڵ پارتى هەیە لەسەر جێبەجێکردنى رێککەوتنەکان لەکاتى خۆیاندا."

بەپێى وتەى لەتیف شێخ عومەر، ئەو بڕگانەى تایبەتن بەمەسەلەى یەکلایى کردنەوەى پۆستى پارێزگارى کەرکوک، گرفتى بۆ رێکەوتنى نێوان ئەوان و پارتى دروستکردووە، وتى"پارتى نەیانتووە رێککەوتنەکان جێبەجێ ناکەین، بەڵام هەنگاوى واقیعى نیە."

دەربارەى نەهاتنە پێشەوەى پارتى بۆ دانانى پارێزگارێکى یەکێتى بۆ کەرکوک و هەڵوێستى حیزبەکەى، لەتیف شێخ عومەر وتى"ئێمە رێککەوتنمان هەیە، نەهاتنە پێشەوە پاساو قەبوڵ ناکات، هەردوولامان قەناعەتمان وابووە دانانى پارێزگارێکى کورد، لانى کەم رێگر دەبێت لە پرۆسەى تەعریب."

سەبارەت بەوەى گەرەنتى چى یە گەر پارتى و یەکێتى لەسەر دانانى پارێزگارێک بۆ کەرکوک رێکبکەون، بەڵام عەرەب و تورکمان رێگر نەبن لەبەردەم دەست بەکاربوونى ئەو پارێزگارەدا، وتەبێژەکەى یەکێتى وتى"ئێمە و پارتى رێککەوتین لەسەر کەسێکى یەکێتى بۆ پارێزگار، دواتر هەوڵەکانمان لەرێگەى بەغداوە لەگەڵ عەرەب و تورکمان و کەمایەتیەکانى تردا دەخەینە گەڕ، بۆ رێککەوتن و ئاساییکردنەوەى دۆخى کەرکوک."

پێشتر دکتۆر کەمال کەرکوکى سەرۆکى ئەنجومەنى سەرکردایەتى کەرکوک/ گەرمیانى پارتى، لەلێدوانێکدا بۆ دەنگى ئەمەریکا، رایگەیاند"پارتى بە دانانى پارێزگارێکى یەکێتى ڕازى نیە، بەڵکو پارێزگارێکى بێ لایەنى دەوێ."

لەوبارەیەوە لەتیف شێخ عومەر، دەڵێت"یەکێک لە گرفتەکان قسەکانى دکتۆر کەمال کەرکوکى بوون، ئەو قسانە نیگەرانیان لاى یەکێتى دروستکرد بەوەى پارتى نایەوێت رێکەوتنەکان وەکو خۆیان جێبەجێ بکات، بۆیە داواى دڵنیایى زیاتر و هەنگاوى عەمەلیمان کردووە.

وتیشى"قسەکانى دکتۆر کەمال کەرکوکى پێچەوانەى رێککەوتنەکانى نێوانمان بوو."

please wait

No media source currently available

0:00 0:04:21 0:00

XS
SM
MD
LG