لەم گوتووێژەی دەنگی ئەمریکادا، رێبوار کاکەیی رۆژنامەنووس باس لە یەکسانی لە بەرامبەر پێدانی زانیارییە رۆژنامەوانییەکان دەکات و دەڵێ:
پێموانییە رۆژنامەنووسان یەکسان بن لە پێدانی زانیاری رۆژنامەوانی، ھۆکارەکەیشی بۆ ئەوە دەگەڕێنێتەوە، ھەر حزبێک کە دەزگایەکی راگەیاندنی لە ژێر دەستە دەیەوێ ھەواڵ و زانیارییەکان بۆ یەکەمجار لە لای خۆیان بڵاوببنەوە، وە ھەندێکجاریش فەرمانە لە رێگەی حزبەوە بەو کەسانە دەدرێت کە لە دەزگایەکی حکومەتدا کار دەکەن، بۆ ئەوەی ھەرچی ھەواڵ و زانیاری ھەن بە راگەیاندنی حزبەکەی خۆی بدرێن.
رێبوار کاکەیی لە بارەی رۆڵی سەندیکای رۆژنامەنووسانی کوردستانەوە لە رێگریکردن لەم حاڵەتەدا گوتی: سەندیکای رۆژنامەنووسانی کوردستان ھەوڵیداوە، بەڵام ئەو توانایەی نییە و یان ئەگەر تواناشی ھەبێت، قسەکانی ئەوان جێگەیان نابێتەوە ئەمەیش ھۆکارەکەی ئەوەیە سەندیکای رۆژنامەنووسان ئەو وادەیەی کە ھەیبووە تەواو بووە و ئەوە بۆ سێ ساڵ دەبێت کۆنگرەی نەبەستووە، بۆیە ئەوەتا دەبینرێ ھەموو داواکارییەکانی سەندیکای رۆژنامەنووسانی کوردستان خۆی لە بەیاننامە بڵاوکردنەوەدا دەبینێتەوە.
تەواوی گوتووێژەکە لەم فایلە دەنگییەی خوارەوە گوێبیست بن.
