Accessibility links

هێرشى پێشمەرگە بۆ سەر داعش و بەردەوامى سوتانى دەغڵ و دانى جوتیاران


پێشمەرگە بە هاوکارى هێزەکانى هاوپەیمانان ئۆپەراسیۆنێکى بۆ سەر چەکدارانى داعش لەسنورى قەزاى خورماتوى پارێزگاى سەڵاحەدین دەستپێکرد، سوتاندنى دەغڵ و دان و لەوەڕگاش لەناوچەکانى کەرکوک و دەڤەرى گەرمیان بەردەوامى هەیە.

سەرلەبەیانى ئەمڕۆ پێنجشەمە، هێزەکانى 70 ى پێشمەرگە بە هاوکارى فڕۆکە فەرەنسیەکان، هێرشیانکردۆتە سەر گوندەکانى شۆراو و پەڵکانەى سەربە ناحیەى زینانەى نزیک قەزاى خورماتو، کە ئەو ناوچەیە چەکدارانى داعشى تێدایەو هیچ هێزێکى پێشمەرگەو عێراقى تێدا نیە.

جەمال ساڵەح بەرێوەبەرى ناحیەى زینانە، بەدەنگى ئەمەریکاى راگەیاند"پێشمەرگە بە هەماهەنگى فرۆکە فەرەنسیەکان ئۆپەراسیۆنى دژى چەکدارانى داعش ئەنجامداوە، لە ئۆپەراسیۆنەکەدا سێ چەکدارى داعش کوژراون و دوو پێشمەرگەش برینداربوون."

هێرشى پێشمەرگەو هاوپەیمانان بۆ سەر چەکدارانى داعش، هاوکاتە لەگەڵ بەردەوامى سوتانى دەغڵودانى جوتیارانى سنورى کەرکوک، کە بەشێک لە لایەنە فەرمیەکان پەنجەى تۆمەت بۆ داعش درێژ دەکەن.

زۆربەى ئەو جوتیارانەى دەغڵ و دانەکانیان سوتێنراوە جیاوازتر لەمەسەلەکە دەڕوانن، پێیانوایە دەستى عەرەبە گوندنیشینەکان لەپشت ئاگر کەوتنەوەکانەوەیە نەک داعش، بەو پێیەى لەسەر خاوەندارێتى کردنى زەوى یە کشتوکاڵیەکان ناکۆکیان هەیە.

مولازم قەیس عەبدولرەزاق وتەبێژى بەرگرى شارستانى کەرکوک، بەدەنگى ئەمەریکاى وت"تەنها لەم هەفتەیەدا 150 حاڵەتى ئاگرکەوتنەوە لەدەوروبەرى کەرکوک هەبووە."

ئاگرکەوتنەوە و سوتانى لەوەڕگاو دەغڵ و دان سنورى ناوچە کێشەلەسەرەکانى تێپەڕاندووە، بەشێوەیەک زۆربەى ناوچەکانى گەرمیانیشى گرتۆتەوە، لەکاتێکدا سەرجەم دانیشتوانى ئەم ناوچانە کوردن و دوورن لەگرفتى ئەمنیشەوە.

گوندنیشینەکانى گەرمیان، پێیانوایە ئەوانەى دەغڵ و دانەکانیان دەسوتێنن خەڵکى ناوچەکانیانن، کێشەو ناکۆکى رابردوو پاڵنەریانە بۆ ئەنجامدانى ئەو کارە.

نیعمەت عەلى وتەبێژى بەرگرى شارستانى گەرمیان، بەدەنگى ئەمەریکاى وت"تەنها لەم مانگەدا 105 حاڵەتى ئاگرکەوتنەوە هەبووە، زۆربەى ئاگرکەوتنەوەکان لە نێو پوش و پاوەن و دەغڵ و دانى دەرەوەى شارەکان ڕوویداوە."

وتیشى"توانیومانە بەهەزاران دۆنم دەغڵ و دان و لەوەڕگاش لە سوتان ڕزگار بکەین."

بۆ رێگریکردن لە سوتاندنى دەغڵ و دانەکانیان، جوتیارانى سنورى کەرکوک و ناوچەى گەرمیان بەخێرایى بەرهەمەکنیان دەدورنەوە،هەروەک هێزەکانى ئاسایشى هەرێمیش بەشەوان لەهەندێک ناوچە بڵاو دەبنەوە تا رێگرى بکەن لە سوتاندنى دەغڵ و دانى جوتیاران.

please wait

No media source currently available

0:00 0:03:22 0:00

XS
SM
MD
LG