Accessibility links

تیرۆرکردنى کەسایەتى و بەرپرس لە کەرکوک بەردەوامى هەیە


تیرۆرکردنى کەسایەتى و بەرپرسان لەکەرکوک بەردەوامى هەیە، محەمەد یونس ى جێگرى بەڕێوەبەرى کۆمپانیاى نەوتى باکور دوا بەرپرسى تیرۆرکراوە کە هەفتەى رابردوو تەقەى لێکراو کوژرا.

ڕەوەند مەلا مەحمود جێگرى بەرپرسى مەڵبەندى کەرکوکى یەکێتى ، بەدەنگى ئەمەریکاى راگەیاند"تیرۆر کردنى جێگرى کۆمپانیاى نەوتى باکور چاوەروان نەکراو بوو."

وتیشى"لەناو کەرکوکدا دەیان جۆر هێز هەیە، ئەمە جگە لەوەى پێکهاتەکان هەموویان چەکداریان هەیە، بۆیە تائێستا دەستى پشت پیلانى تیرۆرکردنى بەرپرسان نەدۆزراوەتەوە."

تیرۆرکردنى بەرپرسان لەکەرکوک خەریکە دەبێتە دیاردە ، بەشێوەیەک لەماوەى ساڵانى رابردوودا دەیان بەرپرسى پێکهاتە جیاوازەکان و ئەفسەرى پۆلیس و کەسایەتى تیرۆرکراون ، دوا بەرپرسیش کە تیرۆر کرا محەمەد یونسە کە کادیرى پارتى بووە.

محەمەد خورشید بەرپرسى لقى کەرکوکى پارتى ، بەدەنگى ئەمەریکاى راگەیاند"بەدواداچوونى ورد دەکەین بۆ دۆزینەوەى دەستى پشت تیرۆرکردنى جێگرى بەرێوەبەرى کۆمپانیاى نەوتى باکور و هیوادارین بگەینە ئامانج ."

لاى خۆشیەوە ئەحمەد عەسکەرى ئەندامى ئەنجومەنى پارێزگاى کەرکوک ، هۆکارى بەئامانج کردنى کەسایەتى و بەرپرسانى کەرکوک بۆ نزیکى داعش لەکەرکوک دەگێرێتەوە، دەڵێت"داعش دەیەوێت لەو رێگەیەوە دوو بەرەکى لەنێوان پێکهاتەکان دا دروست بکات."

بەئامانج کردنى کەسایەتى و پلەدارەکان کەرکوک لەنێو شەقامى ئەو شارەدا بۆچوونى جیاوازى لێ‌ دروستبووە، بەشێک بۆ ململانێ‌ سیاسیەکان و بەشێکى تر بۆ تیرۆر و دەستى گروپە چەکدارەکانى دەگێرنەوە.

XS
SM
MD
LG