شەوى یەکشەممە لەسەر دووشەممە دوو چەكدار كە گومان دەكرێت سەربە داعش بن كەوتنە بۆسەى هێزەكانى ئاسایشەوە لە نزیك گوندى دێلێژەى سەربە قەزاى چەمچەماڵ و هەردوو چەكدارەكە خۆیان تەقاندەوە و كوژران.
مەمەد رەشید بەرێوەبەرى ناحیەى سەنگاوى سەربە قەزاى چەمچەماڵ ، بەدەنگى ئەمەریكاى راگەیاند"دوو چەكدارەكە یەكێكیان خۆى تەقاندووەتەوە و ئەویتریان تەقینەوەى نێو ئۆتۆمبێلەكەى خۆیانى پێدا تەقیوەتەوە و كوژراون."
وتیشى"چەكدارەكان یەكێكیان كوردە و ناوى سەباح سدیقە و خەڵكى ناوچەى ئاغجەلەرە و ئەمیرى داعش بووە ، بەڵام ئەویتریان نەناسراوەتەوە."
بەپێى وتەى بەرێوەبەرى ناحیەى سەنگاو ، ئەو دوو چەكدارەى شەوى رابردوو كوژراون لەوانەن كە لەسنورى كەركوك چەندین كارى تاوانكارانەى وەكو كوشتنى شۆفێرى تاكسى و تاوانى ترى جۆراو جۆریان ئەنجامداوە.
بەپێى زانیاریەكانى دەنگى ئەمەریكا ، چەكدارەكان ئۆتۆمبێلێكى جۆرى ئۆپڵیان پێبووە و لەكاتى كەوتنە بۆسەى هێزە ئەمنیەكان دا یەكێكیان خۆى تەقاندووەتەوە و بەو هۆیەوە چەند كارمەندێكى ئاسایش برینداربوون.
دەربارەى ئەوەى ئەو دوو چەكدارە لەكوێوە رۆیشتونەتە سنورى سەنگاو ، مەمەد رەشید وتى"دوو چەكدارەكە لە خورماتووەوە دزەیانكردوەتە سنورى چەمچەماڵ و ویستویانە بەرەو جێگەى تر برۆن بۆ خۆ حەشاردان."
جگە لەو دوو چەكدارەى شەوى رابردوو كوژراون ، چەند كەسێكى تر بەتۆمەتى داعش بوون دەستگیركراون لەو ناوچەیە كە تێیاندایە لەئەوروپا گەراوەتەوە.
زانیاریەكان ئاماژەبەوەش دەكەن 5 كەسى تر كە تۆمەتبارن بەهەبوونى پەیوەندى لەگەڵ داعش و چەكیان پێ یە خۆیان گەیاندووەتە زۆنگاوەكانى رووبارى سیروان ،
كە ئەو 5 كەسە خەڵكى گەرمیانن و دوانیان پێشتر پێشمەرگە بووە.
ئەحمەد نادر بەرێوەبەرى ئاسایشى قەزاى چەمچەماڵ ، بەدەنگى ئەمەریكاى راگەیاند"ئەوانەى گەرمیان كە بینراون لەگەڵ ئەوانەى چەمچەماڵ هەموویان داعش و پەیوەندیان لەگەڵ یەك هەیە."
قەزاى چەمچەماڵ نزیكەى 50 كم دەكەوێتە رۆژهەڵاتى شارى كەركوكەوە و ئەو قەزایە لەبنەرەتدا سەر بە پارێزگاى كەركوكە، بەڵام لە ئێستادا ئیدارەكەى سەربە پارێزگاى سلێمانى یە.
