کۆمپانیای گازپـرۆمی ڕووسیا ئەمڕۆ هەینی ڕایگەیاند بەرهەمهێنانی نەوتی خاو لە کێڵگەی نەوتی گەرمیانی هەرێمی کوردستانی عێراق لە یەک ملیۆن تۆن تێپەڕی کرد.
ئاژانسی دەنگ‌وباسی کارداری پرایمی ڕووسیا هەواڵەکەی بڵاوکردووەتەوە و دەڵێت لە ساڵی 2011 دەستکراوە بە کارکردن لەو کێڵگەیە و لە ساڵی 2015 پـرۆسەی بەرهەمهێنان تیایدا دەسـتیپـێکردووە.
دەشڵێت کۆمپانیاکە قۆناغی یەکەمی زیادکردنی بەرهەمی کێڵگەکەی تەواوکردووە و ئێستا ڕۆژانە 25 هەزار بەرمیل نەوت لەو کێڵگەیە بەرهەم‌دەهێنرێت. باس لەوەش دەکات پەرەپـێدانی کێڵگەکە بەردەوام دەبێت هەتا تواناکەی دەگاتە بەرهەمهێنانی 35 هەزار بەرمیل نەوت لە ڕۆژێکدا.
جێی ئاماژەیە لە 25 ی مانگی چوار کۆمپانیای گازپـرۆم ڕایگەیاند، دەستیکردووە بە کارکردن لە بیری سەرقەڵا-2 ی کیڵگەی نەوتی گەرمیان و بڕیارە لە پایزی ئەمساڵدا کارکردن لە بیری سەرقەڵا-3 دەسـتپـێبکات.