Accessibility links

دکتۆر کەمال کەرکوکى: دەبێت کەرکوک ئاسایى بکرێتەوە ئینجا بابەتى پارێزگار یەکلایى بکرێتەوە


سەرۆکى ئەنجومەنى سەرکردایەتى کەرکوک/ گەرمیان‌ى پارتى، ئاماژە بەوە دەکات تا دۆخى کەرکوک ئاسایى نەکرێتەوە، دانانى پارێزگار بۆ ئەو شارە هیچ سودێکى نابێت، جەخت لەسەر ئەوەشدەکاتەوە مەسەلەى دانانى پارێزگار بۆ ئەنجومەنى پارێزگا جێهێڵراوە.

لە گفتووگۆیەکدا لەگەڵ دەنگى ئەمەریکا، دکتۆر کەمال کەرکوکى دەڵێت"مەسەلەى دانانى پارێزگارى نوێ بۆ کەرکوک لە دەسەڵاتى ئەنجومەنى پارێزگادایە، لیستى برایەتى و لیستەکانى تر بڕیار دەدەن کە پارێزگار چۆن هەڵبژێردرێت و کێ هەڵبژێردرێت، چونکە ئەو دەسەڵاتە بەپێى یاسا لاى ئەوانە."

ناوبراو، دەشڵێت"دەبێت کەرکوک ئاسایى بکرێتەوە، ئینجا بابەتى پارێزگار یەکلایى بکرێتەوە."

سەبارەت بە بەستنەوەى دانانى پارێزگارى نوێ بۆ کەرکوک بە ئاسایى کردنەوەى دۆخى شارەکەوە، لەکاتێکدا ئەوان لەگەڵ یەکێتى دا لەسەر دانانى پارێزگار رێککەوتوون، دکتۆر کەمال کەرکوکى وتى"ڕاى شەخسى من وایە، هەرکەسێک بکرێتە پارێزگار، جا کەسەکە بەتوانا بێت یان بێ توانا، لەم دۆخەدا هیچى پێ ناکرێت و دەشتوانن سوکایەتى پێ بکەن، بۆیە هەوڵى ئێمە بۆ ئاساییکردنەوەى شارەکەیە."

دەربارەى ئەنجامى گفتووگۆکانیان لەگەڵ بەرپرسانى عێراق لەسەر دۆخى کەرکوک، بەرپرسەکەى پارتى باسیلەوەکرد،گفتووگۆکان بەردەوامیان هەیە، وتى"چاوەڕوانى ئەنجامى باش دەکەین، لەکاتى خۆیدا مەسەلەکان بۆ خەڵکى کوردستان بڵاودەکەینەوە."

لەبەشێکى ترى گفتووگۆکەیدا لەگەڵ دەنگى ئەمەریکا، دکتۆر کەمال کەرکوکى ئاماژەى بەیاساى هەڵبژاردنى ئەنجومەنى پارێزگاکان و ئەنجامدانى هەڵبژاردن لەکەرکوک کرد، وتى"ئەو یاسایەى بۆ هەڵبژاردن دەرکراوە ناڕوونى زۆرى تێدایە، پرۆسەى تەدقیقى تۆمارى دەنگدەران خراوەتە دواى ئەنجامدانى هەڵبژاردنەوە، لەکاتێکدا تەدقیق بۆ ئەوەیە تا تۆمارى دەنگدەران پاک بێت و ئینجا هەڵبژاردن بکرێت."

هەروەها وتیشى"تا دۆخى کەرکوک ئاسایى نەکرێتەوە و بارەگاکانى پارتى ڕادەست نەکرێنەوە، ئەندامانى ئەنجومەن بۆ کەرکوک نەگەڕێنەوە و بابەتى پارێزگار یەکلایى نەکرێتەوە، ئێمە لەگەڵ هەڵبژاردن نین."

سەبارەت بە هەڵوێستى حیزبەکەى لە حاڵەتى ئەنجامدانى هەڵبژاردن لەکەرکوک لەو وادەیەى کە دیاریکراوە، سەرۆکى ئەنجومەنى سەرکردایەتى کەرکوک گەرمیان ى پارتى، دەڵێت"ئێمە لەگەڵ ئەو لایەنانەى هاوڕاین، هەڵبژاردن لەوکاتەدا بە کارێکى نادروست دەزانین، چونکە هەموو عەرەبە هاوردەکان دەتوانن دەنگ بدەن، بەڵام دوا بڕیاریش لاى سەرکردایەتى پارتى یە."

ڕەخنەگرتنى پارتى لە ئەنجامدانى هەڵبژاردن لەکەرکوک، لەکاتێکدایە دکتۆر نەجمەدین کەریم ى پارێزگارى پێشووى کەرکوک ئامادەکارى بۆ دروستکردنى لیست بۆ هەڵبژاردن دەکات، لەو بارەیەوە دکتۆر کەمال کەرکوکى وتى"دکتۆر نەجمەدین پارێزگارى شەرعى کەرکوکە، چونکە تائێستا لەلایەن ئەنجومەنى پارێزگاوە لە پۆستەکەى لانەبراوە، بۆیە خۆى ئازادە چى بڕیارێک دەدات، ئێمە رێز لە بڕیارەکەى دەگرین، ئەو کەسێکى تێگەیشتو و پێگەیشتووە."

please wait

No media source currently available

0:00 0:04:26 0:00

XS
SM
MD
LG