Accessibility links

بومەلەرزە لە هەرێمی کوردستان و ڕۆژئاوای ئێرانیش دەداتەوە


دەزگای جیۆلۆجی ئەمەریکا بۆ چاودێری بومەلەرزە لە جیهان لەسەر ماڵپەڕی خۆی بڵاویکردووە 2 بومەرلەزە لە هەرێمی کوردستانی عێراقی داوە لە ناوچەیەک چەند کیلۆمەترێک لە باشوری ڕۆژهەڵاتی دەربەندیخانەوە دوورە.

دەزگاکە دەڵێت ئەمڕۆ دووشەممە لە کاژمێر 5:10 ی ئێوارە بومەلەرزەی یەکەم بە هێزی 5.4 پـلە بە پـێوەری ڕێختەر و لە قوڵایی 17 کیلۆمەتر لە ناوچەیەکی داوە کە نزیکەی 5 کیلۆمەتر لە باشوری ڕۆژهەڵاتی شاری دەربەندیخانەوە دورە.

بومەلەرزەی دووەمیش لە کاژمێر 5:42 ی ئێوارە بووە بە هێزی 4.7 پـلە بە پـێوەری ڕێختەر و لە قوڵایی 13 کیلۆمەتر لە ناوچەیەکی داوە کە تەنیا چەند کیلۆمەترێک لەوەی یەکەمەوە دوربووە.

کاربەدەستان لە هەردوو شاری دەربەندیخان و هەڵەبجەوە دەڵێن ژمارەیەک کەس بە سووکی برینداربوون.

هاوکات تەلەفزیۆنی ئێرانیش دەڵێت بومەلەرزەیەک بە هێزی 6 بە پێوانەی ڕێختەر لە ڕۆژئاوای وڵاتەکەی داوە واتە ناوچە هاوسنوریەکانی لەگەڵ عێراقدا.

هێشتا هیچ ڕاپۆرتێک نەدراوە لەسەر زیانە گیانی و ماڵییەکانی ئەو بومەلەرزەیەی ئێران کە نزیک بووە لە شوێنی بومەلەرزەکەی مانگی ڕابردووە.

لەو بومەلەرزەیەی لە ناوچەی سەرپێلی زەهاوی دا زیاتر لە 600 کەس گیانیان لە دەستدا.

XS
SM
MD
LG