Accessibility links

دۆخى ژنان لە کەرکوک و ناوچەى گەرمیان


چالاکوانانى بوارى ژنان، دەڵێن بارودۆخى ژنان لە کەرکوک و ناوچەى گەرمیان ئەگەرچى لەهەندێک ڕووەوە بەرەو باشتر رۆیشتووە، بەڵام هێشتا دۆخەکە بۆیان لەبار نیە تا تواناکانى خۆیان پیشان بدەن.

جوان حەسەن سەرۆکى لیژنەى کاروبارى خێزان لەئەنجومەنى پارێزگاى کەرکوک، بەدەنگى ئەمەریکاى راگەیاند"سکاڵا تۆمارکردنى ژنان لەسەر ئەو کەسانەى توندوتیژیان بەرانبەر دەنوێنن لەکەرکوک زیادیکردووە، کە رەنگە ئەمە نیشانەى بەرزبوونەوەى ئاستى هۆشیارى بێت."

بەپێى وتەى ئەندامەکەى ئەنجومەنى پارێزگاى کەرکوک، ژمارەى ئەو ژنانەى سکاڵا تۆمار دەکەن زۆر کەمترن بەراورد بەوانەى کە بەهۆى داب و نەریتى کۆمەڵایەتیەوە کێشەکانیان دەشارنەوە.

جوان حەسەن دەڵێت"ئاڵۆزیە سیاسى و ئەمنیەکانى کەرکوک بووەتە هۆى لەمپەر لەبەردەم کارکردنى ژنان و رێکخراوەکانى ژنان دا، بۆیە چالاکى ژنان بەراورد بەرابردوو کەمتر بۆتەوە."

بەپێى ئامارەکانى لقى کەرکوکى رێکخراوى هیواى عێراقى، دیاردەى فرەژنى و ناپاکى هاوسەرێتى و ئەشکەنجەدانى جەستەیى ژنان لەکەرکوک هێشتا لەئاستێکى بەرزدان.

هاوکات ژینۆ خەلیل چالاکوانى بوارى ژنان لەناوچەى گەرمیان، پێیوایە قەیرانى چەند ساڵى رابردووى دارایى کە بەرۆکى هەرێمى کوردستانى گرت، دەرفەتى بۆ ژنان رەخساند تا زیاتر رێگەى چوونە دەرەوەیان پێبدرێت.

ژینۆ خەلیل وتى"ژنێکى زۆر دوکانیان داناوە و کارى جۆراو جۆر دەکەن بۆ پەیدا کردنى بژێوى، گەرچى هێشتا عەقڵیەتى پیاو سالارى و داب و نەریت رێگرە لەبەردەم تواناکانى ژنان دا."

دۆخى ژنان لەهەرێمى کوردستان بەراورد بە ناوچە جێ ناکۆکەکان باشترە، بەو پێیەى ئاڵۆزى سیاسى و ئەمنى لەو ناوچانە وایکردووە کەمتر ئاوڕ لەکێشەکانى ژنان بدرێتەوە.

please wait

No media source currently available

0:00 0:03:59 0:00

XS
SM
MD
LG