کۆمەڵێک چەکدار بە جلی سوپاوە هێرشیان کردە سەر ئوتێلی ئینتەرکۆنتێنتناڵ لە کابوڵی پایتەختی ئەفغانستان و بووە هۆی ئەوەی پێکدادان ڕووبدات لەگەڵ هێزەکانی ئاسایشی ئەفغانستاندا. لە ئەنجامی ئەم پێکدادانەدا زیاتر لە 30 کەس کوژران و ژمارەیەکی دیکە برینداربوون.
وتەبێژی وەزارەتی تەندروستی ئەفغانستان وەحید مەجروح وتی 19 لاشە گواستراونەتەوە بۆ نەخۆشخانەکانی شارەکە، لەنێویاندا شەش هاوڵاتی بیانی تێدایە و ناسنامەکانیان ناسراونەتەوە.
بەرپرسێکی باڵای ئاسایش کە داوای کرد ناوی بڵاونەکرێتەوە چونکە ڕێگە پێدراو نیە لەگەڵ دەزگاکانی ڕاگەیاندندا قسە بکات وتی ژمارەی کوژراون 30 کەسی تێپەڕ کردووە و لەوانەشە ئەو ژمارەیە زیاد ببێت. لەنێو کوژراوەکاندا کارمەندانی ئوتێلەکە و ئەندامانی هێزەکانی ئاسایشی تێدایە.
وتەبێژی وەزارەتی ناوخۆی ئەفغانستان نەجیب دانیش وتی ئەنجامدەرانی هێرشەکە پێنج کەس بوون و هەموویان کوژراون.
جێی ئاماژەیە وەزیری دەرەوەی ئۆکرانیا باڤلۆ کلیمکین وتی شەش ئۆکرانی لە هێرشەکەدا کوژراون.
وەزیرەکە لە هەژماری تایبەتی وەزارەتەکە نوسیویەتی " سەرۆک ئاگادارکراوەتەوە لە کوژرانی شەش ئۆکرانی لە هێرشەکەی سەر ئوتێلەکەی کابوڵدا."
ئەمەش نوێترین هێرشە لەو زنجیرە هێرشانەی کە دەکرێنە سەر کابوڵی پایتەختی ئەفغانستان.
سەرچاوە/ ڕۆیتەرز