وەزیری دەرەوەی ئەردەن ئەیمەن سەفەدی وتی وڵاتانی ناوچەکە دەبێت بەشداربن لە هەر گفتوگۆیەکی داهاتوودا لەسەر دۆسیەی ناوەکی ئێران، جەختیشی لەوە کردەوە پێویستە لە گفتوگۆکاندا باس لە دەستوەردانەکانی ئێران لە ناوچەکە و بەرنامە موشەکییەکەی بکرێت.
سەفەدی لە میانەی کۆنگرەیەکی هاوبەشدا لەگەڵ وەزیری دەرەوەی ئەڵمانیا و سویددا وتی " لەمیانەی گفتوگۆکانماندا جەختمان لەوە کردەوە پێویستە ناوچەی ڕۆژهەڵاتی ناوەڕاست خاڵی بێت لە چەکی کۆمەڵکوژی و هەروەها باسمان لە گرنگی گەیشتن بە چارەسەرێک کرد بۆ گرژییەکان لەگەڵ ئێران و بابەتی چەکی ناوەکی."
وتیشی " ئێمە لە ئەردەن جەخت لە پێویستی چارەسەرکردنی گرژییەکان لەگەڵ ئێراندا دەکەینەوە لە هەموو ڕووییەکەوە، ناوچەکە پڕە لە ململانێ و پێویستی بە ململانێی دیکە نیە. بۆیە پشتیوانی لە گفتوگۆکردن لەگەڵ ئێراندا دەکەین لەڕووی بابەتی ناوەکییەوە و پێویستە وڵاتانی ناوچەکە بەشدار بن لە هەر گفتوگۆیەکی داهاتوودا لەسەر چۆنێتی مامەڵەکردن لەگەڵ دۆسییەی ناوەکی ئێراندا."
هەروەها ئەوەشی خستەڕوو " پێم وایە بۆ ئەوەی بگەین بە چارەسەرێکی هەمیشەیی، پێویستە مامەڵە لەگەڵ بابەتەکانی دیکەی پەیوەست بە دەستوەردانەکانی ئێران بکەین لە کاروباری وڵاتانی عەرەبیدا، دەبێت ئەوە بوەستێت."
وتیشی " دەبێت چارەسەری بابەتەکانی دیکەی وەکو بەرنامە موشەکیەکەی ئێرانیش بکەین." ئاماژەی بەوەدا " هەموو ئەم بابەتانە بوونەتە هۆی دروستبوونی گرژیی لە ناوچەکەدا."
سەرچاوە/ فرانس پرێس