جه‌بار یاوه‌ر ده‌ڵێت 35 سه‌رباز و تانکێـکی ئێرانی هاتوونه‌ته‌ ناو سنوری هه‌رێمی کوردسـتانی عێراقه‌وه‌

جه‌بار یاوه‌ر ئه‌مینداری گشتی وه‌زاره‌تی پێشمه‌رگه‌ی حکومه‌تی هه‌رێمی کوردستانی عێراق ده‌ڵێت ئه‌و هێزه‌ سه‌ربازیه‌ی ئێران که‌ هاتۆته‌ ناو سنوری هه‌رێمی کوردستانه‌وه‌ پێکهاتوه‌ له‌ سی و پێنج سه‌رباز و تانکێکیان له‌گه‌ڵدایه‌و له‌ دوو بنکه‌دا دامه‌زراون.

به‌ر له‌ هاتنه‌ ناوه‌وه‌ی، هێزه‌ سه‌ربازیه‌کانی ئێران به‌رده‌وام ناوچه‌ سنوریه‌کانی هه‌رێمی کوردستانیان تۆپباران کردووه‌. به‌ڕێز یاوه‌ر ده‌ڵێت تۆپباران له‌لایه‌ن هه‌ردوو حکومه‌تی تورکیا و ئێرانه‌وه‌ به‌رده‌وام هه‌یه‌ بۆ سه‌ر سنوره‌کان و حکومه‌تی هه‌رێمی کوردستانیش به‌ هه‌موو شێواز و له‌ڕێی هه‌موو که‌ناڵه‌کانه‌وه‌ داوای له‌ هه‌ردوو حکومه‌ت کردوه‌ بۆردومانی ناوچه‌ سنوریه‌کان ڕابگرن به‌ڵام ئه‌وان به‌رده‌وام بیانویان ئه‌وه‌یه‌ که‌ گوایه‌ چه‌کدارانی پژاک و په‌که‌که‌ له‌و ناوچه‌ سنوریانه‌وه‌ ده‌چنه‌ ناو خاکی وڵاته‌کانیانه‌وه‌.

له‌ گفت و گۆیه‌کدا له‌گه‌ڵ هاوکارمان به‌ڵێن ساڵح ، جه‌بار یاوه‌ر ئه‌مینداری گشتی وه‌زاره‌تی پێشمه‌رگه‌ی حکومه‌تی هه‌رێمی کوردستانی عێراق ده‌شڵێت هه‌رێمی کوردستانی عێراق هیچ په‌یوه‌ندیه‌کی نییه‌ به‌ ململانێی نێوان پژاک و ئێرانه‌وه‌ یان په‌که‌که‌ و تورکیاوه‌ و حکومه‌تی هه‌رێم له‌و مه‌سه‌له‌یه‌دا هه‌ڵوێستی ڕوون و ئاشکرایه‌ که‌ به‌ هیچ شێوه‌یه‌ک نابێته‌ لایه‌نێک له‌ شه‌ڕکردندا به‌ڵام ئاماده‌یه‌ که‌ ببێته‌ لایه‌نێک له‌ هه‌ر گفت و گۆیه‌کی ئاشتیانه‌دا بۆ چاره‌سه‌رکردن.

ده‌توانن گوێبیستی ده‌قی گفت و گۆکه‌ بن له‌ڕێی کلیککردنی ئه‌و فایله‌ ده‌نگیانه‌ی سه‌ره‌وه‌ی ده‌سته‌ چه‌پ که‌ ماوه‌که‌ی 6:35 خوله‌که‌.