Accessibility links

ئیسرائیل فه‌رمانده‌یه‌کی باڵای حه‌ماس له‌ تۆڵه‌ی هێرشێـکی موشه‌کی فه‌ڵه‌سـتینیـیه‌کان ده‌کوژێت


گروپی چه‌کداری فه‌ڵه‌سـتینی حه‌ماس به‌ڵێـنی داوه‌ تۆڵه‌ی کوشـتنی یه‌ک له‌ فه‌رمانده‌ باڵاکانی خۆی بکاته‌وه‌ که‌ له‌ زنجیره‌یه‌ک هێرشی ئاسـمانی ئیسرائیلدا بۆ سه‌ر غه‌ززه‌ کوژراوه‌.

ڕۆژی شه‌ممه‌ و له‌ میانه‌ی ڕێـوڕه‌سمی ناشـتنی ئه‌و فه‌رمانده‌ کوژراوه‌ی حه‌ماس که‌ به‌ عیسا به‌تڕان ناسراوه‌، لایه‌نگرانی حه‌ماس له‌ شه‌قامه‌کانی ناوه‌ڕاستی غه‌ززه‌دا ڕێـپـێوانێـکیان سـازکرد و هه‌ندێـکیان ته‌قه‌یان به‌ ئاسـماندا کرد.

ده‌مڕاستی حه‌ماس سامی ئه‌بو زوهره‌ ئه‌م هێرشه‌ی ئیسرائیلی به‌سته‌وه‌ به‌ بڕیارێـکی کۆماکاری عه‌ره‌ب که‌ پـێشـتر هه‌فته‌ی ڕابردوو داویه‌تی و تیایدا بیرۆکه‌ی دانوسـتاندنی ڕاسـته‌وخۆی نێوان ئیسرائیل و فه‌ڵه‌ستینیـیه‌کان په‌سه‌ند ده‌کات. گوتی بڕیاره‌که‌ ڕێـگه‌ به‌ ئیسرائیل ده‌دات له‌ ئه‌نجامدانی تاوانه‌کانی به‌رامبه‌ر گه‌لی فه‌ڵه‌سـتین به‌رده‌وام بێت.

گه‌واهیده‌ران و کارمه‌ندانی ته‌ندروسـتی ده‌ڵێن 11 که‌سی دیکه‌ برینداربوون له‌ ئه‌کامی ئه‌و هێرشه‌ ئاسـمانیانه‌ی ئیسرائیل که‌ له‌ شه‌وی هه‌ینیـیه‌وه‌ تا به‌ره‌به‌یانی شه‌ممه‌ چه‌ند شوێنێـکی ناو غه‌ززه‌ی تیایدا کردونه‌ته‌ ئامانج، له‌وانه‌ چه‌ند باڵه‌خانه‌یه‌ک و تونێلی به‌ قاچاخبردنی چه‌ک.

کاربه‌ده‌سـتانی ئیسرائیل ده‌ڵێن ئه‌م هێرشانه‌یان له‌ تۆڵه‌ سه‌ندنه‌وه‌ی ئه‌و هێرشه‌ موشـه‌کیـیه‌ بووه‌ که‌ ڕۆژی هه‌ینی کراوه‌ته‌ سه‌ر شـاری ئاشـکه‌لۆنی باشوری ئیسرائیل.

XS
SM
MD
LG