سەرۆک وەزیری ئیسڕائیل بنیامین نەتانیاهو جەختی لە ڕەتکردنەوەی داواکانی حەماس کردەوە بۆ کۆتایی هێنان بە جەنگەکە لە بەرامبەر ئازادکردنی بارمتەکان و ڕۆژی یەکشەممە وتی کۆتایی هێنان بە جەنگەکە وادەکات حەماس لەسەر دەسەڵات بمێنێتەوە و ئەوەش مەترسییە بۆ سەر ئیسڕائیل.
نەتانیاهو وتی ئیسڕائیل ئامادەیە بۆ ڕاگرتنی شەڕەکە لە پێناو ئازادبوونی ئەو بارمتانەدا کە هێشتا لەلایەن حەماسەوە دەستبەسەرن، کە پێدەچێت ژمارەیان زیاتر لە 130 کەس بێت.
نەتانیاهو وتی " بەڵام لە کاتێکدا کە ئیسڕائیل ئامادەیی پیشانداوە، حەماس هێشتا سوورە لەسەر هەڵوێستە توندەکەی، لەسەروو هەمووشییانەوە داواکەی بۆ کشانەوەی سەرجەم هێزەکانمان لە کەرتی غەززە، کۆتایی هێنان بە جەنگەکە و هێشتنەوەی حەماس لەسەر دەسەڵات."
وتی " ئیسڕائیل ناتوانێت بەوە ڕازی بێت."
وتیشی " ئەو کاتە حەماس لە توانایدا دەبێت بەڵێنەکانی جێبەجێ بکات بۆ دووبارە ئەنجامدانەوەی کۆمەڵکوژی و لاقەکردن و ڕفاندن."
بەرپرسانی فەلەستینی وتییان ڕۆژی یەکشەممە شاندەکەی حەماس لە قاهیرەی میسڕ ئامادەی دووەم ڕۆژی گفتوگۆکانی ئاگربەست بوون لەگەڵ نێوەندگرە میسڕییەکان و قەتەڕییەکاندا، باس لە هیچ بەرەوپێشچوونێکیش نەکراوە چونکە حەماس سوورە لەسەر ئەوەی هەر ڕێککەوتنێک بکرێت دەبێت کۆتایی بە جەنگەکەی ناو غەززە بهێنێت.
سەرچاوە/ ڕۆیتەرز
نەتانیاهو دەڵێت کۆتایی هێنان بە جەنگەکە لە ئێستادا مانای ئەوەیە حەماس لەسەر دەسەڵات دەمێنێتەوە
