Accessibility links

نەتەنیاهو دەڵێت ئیسرائیل بەردەوام دەبێت لە لێدانی جموجۆڵەکانی ئێران لە سوریا


سەرۆک وەزیری ئیسرائیل دەڵێت وڵاتەکەی بەردەوام دەبێت لە کردارەکانی بۆ ڕاگرتنی جموجۆڵە لەشکریـیەکانی ئێران لە سوریا.

بەنجامین نەتەنیاهو ئەمڕۆ سێشەممە لە پەیوەندیـیەکی تەلەفۆنی لەگەڵ ڤلادیمیر پـوتن سەرۆکی ڕووسیا ئەمەی ڕاگەیاند، پاش چەند کاژمێرێک لەوەی فڕۆکەیەکی لەشکری ڕووسیا لەلایەن هێزی بەرگری ئاسمانی سوریا بە هەڵە خرایە خوارەوە لەو دەمەی فڕۆکە جەنگیـیەکانی ئیسرائیل شوێنێکیان لە ناو سوریا بۆردومان دەکرد.

ئۆفیسی ڕاگەیاندنی سەرۆک وەزیری ئیسرائیل دەڵێت نەتەنیاهو لە پەیوەندیـیە تەلەفۆنیـیەکە بە پـوتنی گوتووە ئیسرائیل سوورە لەسەر ڕاگرتنی هەوڵەکانی ئێران بۆ لەناوبردنی ئیسرائیل، لەوانە گواستنەوەی چەک بۆ حزبوڵڵای لوبنان.

پـێشتر لەشکری ئیسرائیل ڕایگەیاند شەوی دووشەممە فڕۆکە جەنگیـیەکانی ئیسرائیل بۆردومانی شوێنێکی لەشکری سوریایان لە پارێزگای لازقیـیە کردووە کە ئێران بە نیازبووە لەوێوە ئامێر و سیستەمی دروستکردنی چەک بۆ حزبوڵڵای لوبنان ڕەوانەبکات.

XS
SM
MD
LG