سوپای ئیسڕائیل ڕایگەیاند ئەو دوو فەرماندەیەی حەماسییان کوشتووە کە لە پشت هێرشەکەی هەفتەی ڕابردووەوە بوون بۆ سەر باشووری ئیسڕائیل.
سوپای ئیسڕائیل وتی میراد ئەبو میراد و عەلی قازی کوشتووە. ئاماژەی بەوەدا میراد بەرپرسی سیستمی ئاسمانی حەماس بووە و قازیش فەرماندەی یەکەیەکی هێزەکانی کۆماندۆ بووە.
ڕۆژی شەممەی ڕابردوو گروپی چەکداریی حەماسی فەڵەستینییەکان هێرشێکی کوشندەی کردە سەر باشووری ئیسڕائیل و بەهۆیەوە زیاتر لە 1300 ئیسڕائیلی کوژراون و ژمارەیەکی زۆریشیان بە بارمتە گرتووە.
لە وەڵامی هێرشەکانی حەماسدا، ئیسڕائیل بەڵێنیداوە گروپی چەکداریی حەماس لە غەززە لە ناوببات و لەو کاتەوە بەردەوام بۆردومانی غەززەی کردووە. لە ئێستاشدا ئامادەکاری دەکات بۆ ئەنجامدانی هێرشێکی بەرفراوان بۆ سەر باکووری غەززە و داوای لە هاووڵاتیانی فەڵەستینی ناوچەکە کردووە شوێنەکانییان چۆڵ بکەن.
سەرچاوە/ ڕۆیتەرز