ڕێکخراوی داعش بەرپرسیارێتی هێرشەکەی ڕۆژی هەینی سەر باڵیۆزخانەی پاکستانی لە کابوڵی پایتەختی ئەفغانستان ڕاگەیاند.
ڕۆژی هەینی هێرشێک کرایە سەر باڵیۆزخانەی پاکستان لە کابوڵ و پاسەوانێکی پاکستانی بە فیشەک بریندار بوو، ئیسلامئابادیش دەڵێت هەوڵێک بووە بۆ کوشتنی باڵیۆزەکەی کە هیچ زیانێکی پێنەگەیشتووە.
ڕێکخراوی داعش وتی هێرشەکە لەلایەن دوو چەکدارییەوە ئەنجام دراوە کە " چەکی نیشانشکنێن و ئاساییان پێبووە " و باڵیۆزی پاکستان و پاسەوانەکانیان کردۆتە ئامانج کە لەو کاتەدا لە حەوشەی باڵیۆزخانەکەدا بوون.
بەرپرسانی تاڵیبان وتیان لێکۆڵینەوە لە هێرشەکە دەکەن و باڵیۆزخانەکە لە بینایەکی تەنیشتییەوە تەقەی لێکراوە. پۆلیس دەڵێت گومانلێکراوێکیان دەستگیرکردووە و چەکەکانیشیان دۆزیوەتەوە.
ڕێکخراوی داعش وتی هێرشەکە بووەتە هۆی بریندار بوونی لانیکەم پاسەوانێک و زیانی گەیاندووە بە بیناکە.
ئۆفیسی دەرەوەی پاکستان وتی ئەو ڕاپۆرتانەیان بینیوە کە تیایاندا داعش بەرپرسیارێتی هێرشەکەی ڕاگەیاندووە.
ئۆفیسەکە لە بەیاننامەیەکدا وتی " بە شێوەیەکی سەربەخۆ و بە ڕاوێژکردن لەگەڵ بەرپرسانی ئەفغانستاندا، ڕاستیی ئەم ڕاپۆرتانە پشتڕاست دەکەینەوە." وتیشی هێرشەکە وەبیرهێنانەوەیەکە لەسەر مەترسی چالاکی چەکدارەکان لە ناوچەکەدا.
وتیشی " دەبێت بە شێوەیەکی یەکلاکەرەوە بە هەموو هێزمانەوە کاربکەین بۆ لە ناوبردنی ئەم مەترسییە."
سەرچاوە/ ڕۆیتەرز