Accessibility links

پەرلەمانی عێراق حکومەتەکەی مستەفا کازمی پەسەندکرد


وێنەی ئەرشیف

لایەنە سیاسیـیەکانی عێراق لە پاش چەندین مانگ لە مشتومڕ و ناکۆکی لەسەر پـێکهێنانی حکومەتێکی نوێ، بۆ دواجار توانیان حکومەتێک پەسەند بکەن.

درەنگانێکی شەوی چوارشەممە بە کاتی عێراق دانیشتنەکەی پەرلەمان دەستیپـێکرد و سەرەتا مستەفا کازمی کارنامەی حکومەتەکەی خوێندەوە. پاشان دەنگدان لەسەر کاندیدەکانی بۆ پـۆستی وەزیری وەزارەتەکان دەستیپـیکرد.

پەرلەمانتاران 15 کاندیدیان پەسەندکرد، بەڵام پـێنجیان ڕەتکردەوە کە کاندیدی وەزارەتەکانی داد و بازرگانی، کشتوکاڵ، کۆچ و کۆچبەران، ڕۆشنبیری بوون . هیچ کاندیدێک بۆ هەردوو وەزارەتی دەرەوە و نەوت ڕانەگەیەندرا و دەنگدان بۆیان دواخرا.

مستەفا کازمی پاش پەسەندکردنی حکومەتەکەی لەسەر تویتەرەکەی نووسی:

جێی وەبیرهێنانەوەیە عادل عەبدولمەهدی سەرۆک وەزیری پـێشوو لە کۆتایی مانگی یازدەی ساڵی ڕابردوو نامەی دەست لەکارکێشانەوەکەی ڕەوانەی پەرلەمان کرد و پەرلەمانتاران بە کۆی دەنگ کە 240 پەرلەمانتار ئامادەی دانیشتنەکە بوون، دەست لەکارکێشانەوەکەیان پەسەندکرد.

دەست لەکارکێشانەوەکەی عەبدولمەهدی پاش ئەوە هات کە خۆپـیشاندانی ناڕەزایی گەورە شارەکانی ناوەڕاست و باشوری وڵاتەکەی گرتەوە لە ئەنجامی بەرزی ڕێژەی بێکاری و خراپی خزمەتگوزاریـیەکان. خۆپـیشاندانەکان توندوتیژیيان لێکەوتەوە و زیاتر لە 500 کەس کوژران کە زۆربەیان لە خۆپـیشاندەران بوون و بە هەزاران کەسی دیکەش برینداربوون.

مستەفا کازمی تەمەن 53 ساڵ، بەڵێنی داوە هەموو هەوڵێکی خۆی بدات بۆ نەهێشتنی گەندەڵی و چارەسەرکردنی کێشەکان و ئارامی و دادپەروەری لە وڵاتەکەیدا بهێنێتە دی و هەروەها بەپـێی دەستور کێشەکانی نێوان بەغدا و هەولێر چارەسەربکرێن، وە بەر لە دانیشتنەکە لەسەر تویتەرەکەی بە هەرسێ زمانی عەرەبی و کوردی و ئینگلیزی نووسی:

لیستی وەزیرەکانی لە حکومەتەکەی مستەفا کازمی پەسەندکران:

نەبیل عەبدولساحب، وەزیری خوێندنی باڵا.

جومعە عناد، وەزیری بەرگری.

عوسمان ئەلغانمی، وەزیری ناوخۆ.

عەلی عەلاوی، وەزیری دارایی.

خالد نەجم بەتال، وەزیری پـلاندانان.

نازنین محەمەد، وەزیری نیشتەجێکردن و ئاوەدانکردنەوە.

حەسەن محەمەد عەباس، وەزیری تەندروستی.

ماجد مەهدی عەلی، وەزیری کارەبا.

ناسر حسین بەندەر، وەزیری گواستنەوە.

عەدنان درجال، وەزیری لاوان و وەرزش.

مەنهەل عەزیز، وەزیری پـیشەسازی و کانزایـیەکان.

ئەرکان شهاب وەزیری گەیاندن.

عادل حاشوش، وەزیری کار و کاروباری کۆمەڵایەتی.

مەهدی ڕەشید، وەزیری سەرچاوە ئاویـیەکان.

عەلی حەمید، وەزیری پەروەردە.

XS
SM
MD
LG