ژمارەیەک ئۆتۆمبیلی حزبوڵڵای عێراق لە خاڵێـکی پشکنینی پـۆلیس لە ڕۆژهەڵاتی بەغدا نەوەستاون و پـۆلیسەکان تەقەیان لێکردوون و شەڕە تەقە لە نێوانیان ڕوویداوە و لە ئاکامدا 3 کەس برینداربوون کە دووانیان پـۆلیسن.
سەرچاوەیەک لە وەزارەتی ناوخۆی عێراق ئەمڕۆ چوارشەممە ئەمەی بۆ ئاژانسی دەنگوباسی فڕانس پـرێس ڕاگەیاند و گوتی لە پاش ڕووداوەکە هێزەکانی پـۆلیس گەمارۆی بارەگای حزبوڵڵایان داوە کە دەکەوێتە جادەی فەلەستین لە ڕۆژهەڵاتی بەغدا.
بەپـێی میدیاکانی عێراق چەکدارێکی حزبوڵڵا تەقەی لە هێزەکانی پـۆلیس کردبوو و ئێستا ڕادەستی دەسەڵاتداران کراوە بە سەرپەرشتی قاسم ئەلئەعرەجی وەزیری ناوخۆی عێراق.
جێی ئاماژەیە حزبوڵڵای عێراق لە پاڵ حەشدی شەعبی شەڕی کردووە و لە سوریاش شەڕی بۆ ڕژێمی ئەسەد کردووە. یەکشەممەی ڕابردوو بە هێرشێکی ئاسمانی کە پـێدەچێت ئیسرائیل ئەنجامی دابێت، ژمارەیەک چەکداری لە نزیک بوکەمالی سوریا کوژران.