Accessibility links

وردەکارى ئۆپەراسیۆنى ئەمڕۆ چوارشەممەی هێزە عێراقیەکان لە دژى گروپی"ئاڵا سپـیـیەکە"


لە سەرلەبەیانى ئەمڕۆ چوارشەممەوە هێزە عێراقیەکان ئۆپەراسیۆنێکى گەورەیان بۆ شاخى غەرە و ناوچەکانى باکورى رۆژهەڵاتى قەزاى خورماتو دەستپێکردووە، ئامانج لە ئۆپەراسیۆنەکە کە تا ئێستا بەردەوامە، دەرهێنانى ئەو ناوچانەیە لەبن دەستى پاشماوەکانى داعش کە بەهێزە"ئاڵا سپیەکە"ناسراون.

عەلى حسێنى وتەبێژى میحوەرى باکورى عێراقى حەشدى شەعبى، بە دەنگى ئەمەریکاى راگەیاند"ئۆپەراسیۆنەکەمان بەردەوامى هەیە، تائێستا 46 بۆمبى چێنراومان تەقاندۆتەوە و دووسەد بۆمبى تریشمان پوچەڵکردووەتەوە."

ئاماژەى بەوەشکرد تا ئێستا لەگەڵ هێزە ئاڵا سپیەکەدا هیچ رووبەروو بوونەوەیەک رووینەداوە، بەڵام بەهۆى بۆمبەوە دوو چەکدارمان برینداربوون، وتیشى"هێزە ئاڵا سپیەکە یان ناوچەکەیان جێهێشتووە، یان خۆیان حەشارداوە."

بەپێى زانیاریەکانى دەنگى ئەمەریکا، ئامانجێکى ترى حەشدى شەعبى لەئۆپەراسیۆنەکەى ئەمرۆ، دەرهێنانى گوندە کوردنیشینەکانى پشتى شاخى غەرەى نزیک قەزاى خورماتوەوە لەبن دەستى چەکدارە کوردەکانى خەڵکى خورماتو، کەبەچەکدارە "خۆبەخشەکان" ناسراون.

عەلى حسێنى وتى"ئەو ئامانجەمان بەدەستهێناو چەکدارە خۆبەخشەکانمان لەو ناوچانە دەرکرد، بەتایبەت ئەوان لەو ناوچانەوە خورماتویان هاوەنباران دەکرد."

ژمارەیەکى زۆر لەدانیشتوانى گوندە کوردنیشینەکان گوندەکانیان جێهێشت و ژمارەیەکیشیان لەناوچەکەدا مانەوە، هێزەکانى حەشدى شەعبیش بەناوچەکەدا بڵاوکراونەتەوە و پێشمەرگەش لەگوندەکاندا ماونەتەوە.

مام وەهاب فەرماندەى پێشمەرگە لەنزیک خورماتو، بەدەنگى ئەمەریکاى راگەیاند"هەرچەندە حەشد هێزى هێناوەتە گوندە کوردنیشینەکانى باکورى خورماتو، بەڵام وەکو پێشمەرگە نەکشاوینەتەوە و پرۆسەکە بەهەماهەنگى بەرێوەدەچێت."

وتیشى"حەشدى شەعبى بەڵێنیان داوە دواى تەواوبوونى ئۆپەراسیۆنەکەیان لە ناوچەکە بکشێنەوە."

XS
SM
MD
LG