Accessibility links

عێراق بە نیازە لولەیەکی نەوتی پـێشووی بۆ تورکیا بخاتەوە کار

  • VOA News

وەزیری نەوتی عێراق داوای لە چەند کۆمپانیایەکی حکومەتەکەی کردووە بە خێرایی کاربکەن بۆ دەسـتپـێکردنەوەی هەناردەی نەوت لە ڕێگەی لولەیەکی نەوتی پـێشووی وڵاتەکەی کە بەرەو بەندەرێکی تورکیا لەسەر دەریای ناوەڕاست دەڕوات.

ماڵپەڕی وەزارەتی نەوتی عێراق ئەمڕۆ سێشەممە ڕایگەیاند جەبار عەلی ئەللعێبی فەرمانی بە هەریەک لە کۆمپانیای نەوتی باکور و کۆمپانیای پـرۆژەکانی نەوت و کۆمپانیای لولە نەوتیـیەکان کردووە پـلانێکی بە پەلە دابنێن بۆ چاککردنەوەی ئەو لولە نەوتەی بە هەردوو پارێزگای سەڵاحەدین و نەینەوا تێپەڕدەبێت و بیرە نەوتیـیەکانی کەرکوک بە بەندەری جیهانی تورکیاوە دەبەستێتەوە.

جەختی لەوەش کردووەتەوە گرفتە دارایی و ئابوریـیەکان نابنە کۆسپ لە بەردەم پـلانەکەیان و خودی حەیدەر عەبادی سەرۆک وەزیری عێراق بەدواداچوون بۆ کارەکە دەکات.

جێی ئاماژەیە ڕۆژی دووشەممە وەزیری نەوتی عێراق لە وەزارەتەکەی پـێشوازی لە فاتح یڵدز باڵیۆزی تورکیا لە بەغدا کرد و باسیان لە فراوانکردنی هاوکاریـیەکانی نێوان هەردوو وڵات کرد لە بواری کەرتی نەوتدا. باڵیۆزی تورکیا لای خۆیەوە جەختی کردووەتەوە کە حکومەتی وڵاتەکەی بڕیاری داوە تەنها لەگەڵ حکومەتی عێراقدا مامەڵە نەوتیـیەکان ئەنجام بدات.

XS
SM
MD
LG