Accessibility links

فەرماندەیەک: هیچ رێکەوتنێک بۆ گەڕانەوەى پێشمەرگە بۆ خانەقین نەکراوە


هیچ رێککەوتنێک لەنێوان وەزارەتى پێشمەرگەو هێزە عێراقیەکان دا نەکراوە، بۆ گەڕانەوەى هێزەکانى پێشمەرگە بۆ سنورى قەزاى خانەقین ى پارێزگاى دیالە.

لەچەند رۆژى رابردوودا، گرتەى ڤیدیۆیى هێزێکى پێشمەرگە بڵاوکرایەوە کە گوایە بۆ خانەقین گەڕاونەتەوە، بەڵام بەرپرسانى پێشمەرگە گەڕانەوەیان رەتدەکەنەوە.

عەمید عیرفان حەمەخان جێگرى فەرماندەى لیواى 3 ى پێشمەرگە، بەدەنگى ئەمەریکاى راگەیاند"گەڕانەوەى پێشمەرگە بۆ خانەقین دوورە لە راستیەوە."

وتیشى"پڕو پاگەندەى گەڕانەوەى پێشمەرگە لەوەوە سەرچاوەى گرتووە، کە ئێستا لەنێو موحەرەمداین و بەو هۆیەوە ژمارەى هێزەکانى پێشمەرگە لەناوچەکە زیادکراوە."

لەماوەى چەند مانگى رابردوودا، ژمارەیەک گوندى کوردنیشینى سنورى خانەقین کرانە ئامانج، دانیشتوانى ئەو گوندانەش بۆ پارێزگارى لێکردنیان، داواى گەڕانەوەى پێشمەرگەیان کردبوو، بەڵام هێزە عێراقیەکان ئەو داوایەیان رەتکردبویەوە.

ئەبو مونتەزر فەرماندەى حەشدى شەعبى لە خانەقین، بەدەنگى ئەمەریکاى راگەیاند"چى بۆ خانەقین باشە، ئێمە ئەوە دەکەین، جا گەڕانەوەى پێشمەرگە بێت یان ئاسایش."

وتیشى"خانەقینیەکان چیان بوێت، ئێمە ئەوە دەکەین."

قەزاى خانەقین ى پارێزگاى دیالە کە زۆربەى دانیشتوانەکەى کوردە، هەرچەندە لەدواى 16 ى ئۆکتۆبەرەوە، دەسەڵاتى حکومەتى عێراقى بۆ گەڕاوەتەوە، بەڵام زۆربەى هێزە عێراقیەکان کە لەشارەکە جێگیرکراون کوردن.

please wait

No media source currently available

0:00 0:01:49 0:00

XS
SM
MD
LG