Accessibility links

شێخ جەعفەر مستەفا: کاردەکرێت بۆ ئەوەى جەلەولا و سەعدیە بخرێنە چوارچێوەى پرۆسەکانى هاوپەیمانانەوە


هێزەکانى هاوپەیمانان بەڵێنى وەشاندنى گورزى ئاسمانى زیاتر لە هێزەکانى داعش دەدەن، لە حاڵەتى جموجۆڵى چەکدارانى ئەو رێکخراوەدا بە ئاڕاستەى کەرکوک و ناوچە کێشەلەسەرەکانى ترى ژێر دەسەڵاتى هێزى پێشمەرگە.

رۆژى یەکشەمە بەرپرسانى پێشمەرگە لەگەڵ هێزەکانى هاوپەیماناندا کۆبونەوە، گفتوگۆیان لەبارەى جموجۆڵە فراوانەکانى داعش لە دەوروبەرى کەرکوک و خورماتو و ناوچە کێشەلەسەرەکانى پارێزگاى دیالە کرد.

جەعفەر شێخ مستەفا، فەرماندەى گشتى هێزەکانى 70 ى پێشمەرگە و بەشداربوى کۆبونەوەکە، بە دەنگى ئەمەریکاى راگەیاند"هێزەکانى هاوپەیمانان بەڵێنیان پێداین لە حاڵەتى هێرشى داعش دا پشتیوانى پێشمەرگە بکەن."

وتیشى"هەڕەشەى زۆر لەسەر شارى کەرکوک و جەلەولا و خانەقین هەیە، هاوپەیمانان بەڵێنیان دا لەکاتى پێویست دا بێنە خەت بۆ پشتیوانى پێشمەرگە و پێشمەرگەش هەمیشە بەحاڵەتى ئامادەباشیدایە."

سەبارەت بەوەى داعش تاچەند پیلانى ئەنجامى هێرشى فراوانى هەیە، جەعفەر شێخ مستەفا وتى"داعش هەمیشە جێى مەترسى بووە، بۆیە پیلانى هەیە لەناردنى خۆکوژەوە تادەگاتە هێرشى فراوان ، بەڵام پێشمەرگە بۆ بەرپەرچدانەوەیان ئامادەیە."

بەپێى زانیاریە هەواڵگیریەکان، نزیکەى 600 چەکدارى داعش لەناوچە کوردستانیە کێشەلەسەرەکانى پارێزگاى دیالە کۆبونەتەوە و پیلانى هێرشى یان بۆ سەر هەندێک ناوچە دارشتووە، لەکاتێکدا لەساڵى 2014 ەوە ئەو ناوچانە لەدەرەوەى پرۆسە سەربازیەکانى هاوپەیمانانە و هێرشیان تێدا ئەنجام نەداوە.

لەوبارەیەوە فەرماندەى هێزەکانى 70 ى پێشمەرگە، وتى"کار لەسەر ئەوە دەکرێت جەلەولا و سەعدیەش بخرێنە چوارچێوەى پرۆسە سەربازیەکانى هاوپەیمانانەوە."

هەرچەندە زانیاریەکان باسلەوەدەکەن شەڕى حەویجە بۆ دواى شەڕى تەلەعفەرى پارێزگاى نەینەوا دواخراوە، بەڵام بەپێى وتەى جەعفەر مستەفا بریاردراوە وەزارەتى پێشمەرگەو وەزارەتى بەرگرى عێراق بەهەماهەنگى لەگەڵ ئیدارەى کەرکوک و هاوپەیمانان پلانى شەڕى حەویجە دابڕێژن.

XS
SM
MD
LG